Модриците се кожни промени кои настануваат како резултат на механички трауми. Во таа прилика доаѓа до оштетувања на ситните крвни садови под кожата заради што крвта останува заробена под површината на кожата. Оваа ’заробена’ крв постепено се апсорбира како што модрицата зацелува.
Одделни намирници можат да ги зајакнат крвните садови и да помогнат во превенцијата од појава на модрици, односно да ја намалат склоноста кон нивно создавање, како и да го забрзаат процесот на нивно губење. Тоа најнапред е ананасот, кој содржи бромелаин – ензим кој делува антиинфламаторно и го забрзува зацелувањето. Кај проблемите со модриците помага и кверцетинот, во чии најдобри извори спаѓаат јаболката, цитрусите, црвениот кромид, јагодите и зрнестото овошје, како и зелениот лиснат зеленчук.
Недостатокот на витамин Ц, со кој изобилуваат пиперките, зелката, спанаќот, брокулата, кивито и цитрусното овошје, исто може да биде една од причините за лесно појавување на модриците. Храната богата со витамин К, исто така, ја намалува склоноста кон модрици, а со овој витамин е богат зелениот зеленчук (кељ, прокељ, брокули, спанаќ, зелена салата), како и јагодите и боровинките. Семките од тиква, мешунките и морските плодови претставуваат одличен извор на цинк – минерал кој го поттикнува зацелувањето на оштетеното ткиво. Исто така, е важен за внес на протеини кои ги зајакнуваат капиларите, а со нив изобилуваат пилешкото, мисиркиното, рибата и млечните производи.
Доколку сте забележале дека модрици ви се појавуваат, а не сте се повредиле; дека се појавуваат лесно и често, како и дека се појавуваат на грбот или абдоменот консултирајте се со лекар зашто причината може да биде некоја болест или недостаток на некој нутритиент.
