Функцијата на ноктот е да го штити крајниот дел од прстот од повреди, да помогне во подигнувањето на предметите, а настанува од клетките на матриксот на ноктот. Дистрофија на ноктот е пореметување на растењето кое може да биде предизвикано од:
- Трауми
- Инфекции
- Воспаленија
- Тумори
- Наследни пореметувања на кожата и ноктите
Речиси половината од деформациите на ноктите се должат на габичните инфекции на ноктите, онихомикози, од кои десетпати почести се инфекциите на ноктите на нозете, отколку на рацете. Најчести причинители на инфекциите на ноктите на нозете се дерматофитите, на пример Trichophyton rubrum, а додека ноктите на рацете најчесто ги напаѓа Candida albicans. Како ризик фактори за добивање габична инфекција на ноктите се сметаат возраста, пливање, инфекција на стопалата со дерматофити, псоријаза, дијабетес, генетска склоност и друго.
Покрај габичните инфекции, деформации на ноктите можат да предизвикаат и паронихијата, што е инфекција на спојот меѓу ноктот и кожата на прстот, потоа псоријазата, која е воспалителна болест која предизвикува симптоми на кожата, а во 55 отсто од случаите ги зафаќа и ноктите. Меѓу потешките заболувања на ноктите спаѓаат и планоцелуларниот карцином, кој е најчест малиген тумор на ноктите и најчесто се јавува кај повозрасните мажи, како и меланомот на ноктот, кој е редок меланом кај белата раса луѓе, но почест кај црната.
