Трауматските повреди на мозокот кои настануваат после здобиени удари во главата доведуваат до зголемен ризик од развој на деменција за дури 24 %, било заклучено на база на примерок од речиси три милиони луѓе.
Податоците биле собирани 36 години, а преземени се од данскиот државен регистар на пациенти. Ризикот од развој на деменција се зголемува во зависност од бројот на повредите и нивната тежина, објавено е во стручниот магазин „The Lancet Psychiatry“.
„Пациентите со историја на трауматски повреди на мозокот имаат зголемен ризик од развој на деменција, дури и неколку децении после самата повреда“, тврди лидерот на студијата Џеси Фан од Медицинскиот факултет во Сиетл. Ова, исто така, се однесува и на помалку сериозни повреди, како што е потрес на мозокот.
Научниците напоменуваат дека апсолутниот ризик за поединецот е доста низок. Во студиската група, 5,3 % од луѓето кои страдале од деменција претрпеле тешка повреда на мозокот во помлада возраст, во споредба со 4,7 % од луѓето кои не страдале од деменција.
„Резултатите од студијата не упатуваат на тоа дека кај сите луѓе после траума на мозокот подоцна во животот ќе се развие некаков вид на деменција“, вели Фан.
На сите оние кои имале некој вид на трауматска повреда на мозокот предизвикана од пад, повреда добиена во боречки спорт, во тепачка или во сообраќајна несреќа – им се советува претпазливост, вежбање, избегнување на пушење, премногу алкохол и масна храна
„Многу е важно лицето кое веќе доживеало такво нешто да не се најде повторно во слична ситуација. Важно е да се спречат нови трауми, бидејќи ризикот од деменција се зголемува со бројот на трауматски повреди на мозокот“, предупредува Фан.
Врз основа на податоците на Светската здравствена организација (СЗО) околу 50 милиони луѓе во светот страдаат од некоја форма на деменција (вклучувајќи ја Алцхајмеровата болест на која се однесуваат две третини од случаите).
