Повеќето проблеми со кожата на стапалата може да се спречат. Важно е да се знае каде и како може да се појават инфекции на кожата. Препораката е секогаш во колектив да се носат папучи (на базен, во сауна, во фитнес центри), особено во туш кабините. Експертот д-р Јане Басаровски, специјалист дерматовенеролог, наведува дека е потребно да се спроведува секојдневна хигиена на стапалата со сапун, кои по миењето треба убаво да се исушат. При интенизвно потење се препорачува миење и повеќе пати дневно. Избор на чорапи од природни материјали, кои брзо се сушат. Да се избегнува делење на пешкир или обувки со други лица. Во случај промените да траат подолго време и не поминуваат, треба да се консултира дерматолог.
Во продложение д-р Басаровски открива кои се тие проблеми кои најчесто го зафаќаат стапалото.
ГАБИЧНИ И ВИРУСНИ ИНФЕКЦИИ
Атлетското стапало е габична инфекција на кожата на стапалата. Најчесто го зафаќа подрачјето помеѓу прстите и под табанот. Секому може да му се случи и се манифестира со лушпеста и испукана кожа, речиси секогаш проследена со чешање. Инфекцијата најчесто се појавува во колективи (базен, сауна, фитнес центар).
Габичната инфекција неретко може да ги зафати и ноктите. Потоа, ноктите може да ја променат бојата и структурата, може да се задебелат, испукаат или да се одвојат од кожата.
Важно е навреме да се постави дијагноза и соодветно да се лекува со препарати против габички.
КЛАВУС (“КУРЈЕ ОКО“), БРАДАВИЦИ
Клавусот или курјото око е задебелување на кожата во подрачјето на постојан притисок, кое често може да биде болно. На така оштетената кожа може да се надоврзе и ХПВ инфекција и да се појави брадавица. Брадавиците се заразни и се шират со контакт. Може да бидат во боја на кожата, на ниво на кожата, испапчени и повеќе брадавици можат да се спојат во една структура.
Најчесто растат на табаните и доколку се под притисок можат да растат во спротивна насока. Често се болни, може да имаат црвени и црни дамки на површината.
Во амбулантски услови може да се замрзнат со течен азот, додека во домашни услови се третираат со разни препарати кои најчесто содржат киселини.
ОТЕЧЕНИ СТАПАЛА
Отечените стапала обично се предизвикани од долготрајно стоење или седење. Почесто се јавуваат во бременоста. Често може да биде знак за нарушена циркулација, поради проширени вени или дијабетес. Проблеми со бубрезите или тироидната жлезда исто така може да ја предизвикаат оваа состојба.
ПЕРУТАЊЕ И ПУКАЊЕ НА КОЖАТА (ДИСХИДРОЗА, КОНТАКТЕН ДЕРМАТИТИС)
Перутањето и пукањето на кожата најчесто се знак за габична инфекција (атлетско стапало), но може да се јави и при алергиски реакции. Од контактните алергени почести се алергиите на метали (никел, хром), бои и конзерванси.
Слично може да изгледаат и промените кај псоријаза на стапалата.
БЕНКИ
Ракот на кожа и меланомот вообичаено се поврзуваат со делови од телото изложени на сонце, но меланомот може да се појави и на стапалата, прстите и ноктите. Најчесто тоа се кафеави или црни точкасти промени. Поради различната структура на кожата во подрачјето на табаните, бенките може да изгледаат поинаку од останатите бенки. На ноктите најчесто се во форма на линија и се формираат надолжно.
