Летното сметање на времето во 2018 година завршува на 28 октомври во 3 часот со поместување на сказалките за еден час наназад со што почнува зимското сметање на времето.
Иако зимското сметање на времето е всушност нормално, а летното се смета за исклучок, ние поголемиот дел од годината, дури 7 месеци живееме во склад со летното сметање на времето.
Преминот на летно време има подрастични последици бидејќи го нарушува биолошкиот ритам и одзема еден час од можниот сон, додека есенското поместување на часовникот нути компензација, односно го додава тој одземен час. Денот и натаму се состои од 24 часа, но оваа претстојна недела ќе има час повеќе. Ова се некои предности и недостатоци на преминувањето на зимското сметање на времето.
ПРЕДНОСТИ
Стручњаците за спиење тврдат дека повеќето луѓе потешко се прилагодуваат на летното отколку на есенското помесување на времето поради губењето на еден час сон. Организмот многу полесно го поднесува токму поради спиењето преминот на зимско време.
Шведските научници проучувајќи илјадници пациенти наназад 20 години, заклучиле дека броот на срцеви удари опаѓа во неделата по враќањето на часовникот наназад за 21%. Состојбата е обратна на пролет, кога стапката на срцеви удари расте седум дена по пресметувањето на времето. Штетното влијание по срцето е најизразено првите три дена по денот во кој се преминува на летно сметање на времето.
НЕДОСТАТОЦИ
На есен само мал дел од луѓето всушност го добиваат тој ветен дополнителен час спиење. Во текот на наредната недела многумина се будат порано, имаат повеќе проблеми со спиењето, а голема е веројатноста дека ќе се разбудат во текот на ноќта. Лицата кои спијат помалку од седум часа и рано стануваат имаат најмногу проблеми со прилагодувањето на новиот распоред.
Преминот на зимско сметање на времето може да биде поврзан со сезонско пореметување на расположението, односно есенска депресија. Поради пократкиот ден, односно намалената дневна светлина, некои лица би можеле да почувствуваат симптоми како недостаток на енергија, безволност, засилен апетит, пореметување на спиењето, засилена желба за благо и намалување на полова активност. Општо, играњето со природниот циклус предизвикува намалена продуктивност и губење на интересот за работа, а според научниците, со поместувањето на часовникот луѓето се поподложни на болести и на поголем замор.
Доаѓа до недостаток на витамин Д, кој во најголеми количини се црпи од сончевите зраци. Со оглед дека сонце има се помалку, потребно е да се направи баланс во исхраната. Во храна богата со витамин Д спаѓа рибата, жолчка од јајце, млечни производи и квасец.
