Оваа зима би можело да се појават потполно нови варијанти на КОВИД-19, соопшти Агенцијата за лекови на Европската унија (ЕМА), но постоечките вакцини би требало да ги заштитат луѓето од сериозни исходи од болеста и смрт.
Додека ЕУ се подготвува да започне кампања за вакцинација воочи бранот нови случаи на коронавирус подоцна оваа година, Европската агенција за лекови (ЕМА) нагласи дека вирусот сè уште циркулира и брзо се развива.
“Може да се појави потполно нова варијанта која денес не сме во состојба да ја предвидиме“, изјави шефот за вакцини на ЕМА, Марко Кавалери.
Затоа европската стратегија е да има широк спектар на ажурирани вакцини кои се приспособени да одговорат на новите варијанти.
ЕМА неодамна одобри вакцини од Фајзер и Модерна кои се прилагодени да се борат против подваријантата BA.1 на омикрон.
Верзијата на Фајзер ажурирана за доминантните соеви BA.4 и 5 треба да биде одобрена во средината на септември, додека сличната вакцина на Модерна исто така е во подготовка.
