Досегашните истражувања укажувале на тоа дека белите дробиви се стиснуваат под претерано оптоварување. За прв пат, истражувањето на австралиски научници открило дека масното ткиво ги стеснува ѕидовите на дишните патишта и ограничува снабдување со кислород.
Научниците од „Sir Charles Gairdner Hospital and the University of Western Australia“ во Перт откриле дека вишокот масно ткиво, медицинското име за телесна маснотија, ја набабрило дебелината на ѕидовите на дишните патишта и предизвикало воспаление. Научниците, кои ги предводел Џон Елиот, анализирале 52 белодробни крила кои биле донирани за „Airbank Tissue Biobank”.
Од овие бели дробови, 15 им припаѓале на луѓе кои не пателе од астма, 21 кои имале астма, но умреле од други причини и 16 кои умреле од астма. Под микроскоп се прегледани повеќе од илјада дишни патишта, а количеството на масно ткиво најдено во нив е споредувано со индексот на телесна маса (БМИ) на секоја личност додека била жива. БМИ примерокот се движел од 15 до 45, а во здрав распон тој изнесува меѓу 18,5 и 24,9.
Резултатите покажале позитивна поврзаност меѓу насобирањето масно ткиво во ѕидовите на дишните патишта и БМИ кај поединците. Оние кои пателе од астма, исто така, имале наталожени масти во своите артерии. Професорот Тери Трустерс, претседател на Европското респираторно друштво, ги поздравил резултатите на работата објавени во „European Respiratory Journal”.
„Ова е важен наод за врската меѓу телесната тежина и респираторните болести, затоа што покажува како прекумерната тежина или дебелината може да ги влоши симптомите кај личностите кои имаат астма“, вели професор Трустер.
