Анализирајќи бројни студии и сопствени необјавени податоци, Центарот за контрола и превенција на болести на САД (ЦДЦ) излезе со најново истражување кое открило дека имунитетот предизвикан од инфекција и оној предизвикан од вакцината, траат најмалку шест месеци, но дека вакцините се подоследни во заштитата и даваат огромен поттик на создавањето антитела за лицата кои претходно прележале КОВИД-19.
Споредувајќи ги двата вида имунитет, научниците дошле до заклучок дека вакцинацијата нуди “поголемо и подоследно ниво на имунитет од самата инфекција“.
НИВОТО НА АНТИТЕЛА МНОГУ ВАРИРА ПО ИНФЕКЦИЈАТА
Инфекциите со коронавирус можат да предизвикаат тешки заболувања, но и асимптоматска болест, а ЦДЦ открил дека нивоата на антитела по инфекцијата во голема мера варираат од поединец до поединец.
Во извештајот се наведува дека не постои универзален тест кој на лекарите и јавноста би им овозможил сигурно мерење на имунитетот на поединецот, по болеста. Иако повисоки нивоа на неутрализирачки антитела по правило сигнализираат и поголема заштита, научниците и понатаму точно не знаат колкаво ниво на антитела е потребно за поединецот да биде заштитен од нова зараза.
Заклучокот на студијата на ЦДЦ е: Со оглед на она што се знае, а што не се знае за имунитетот, лицата кои биле заразени со вирусот и понатаму треба да се вакцинираат.
Заклучокот на оваа студија потсетува на друга студија, која ЦДЦ ја објави претходно во петокот, а која дожала дека вакцините нудат поголемо ниво на заштита отколку претходна инфекција. Таа студија вели дека е помала веројатноста вакцинирани пациенти хоспитализирани со симптоми слични на КОВИД -19 да бидат позитивни на вирусот од оние кои месеци претходно се опоравиле од инфекцијата. Со други зборови, кај вакцинираните пациенти кои имаат симптоми на КОВИД-19, поголема е веројатноста да не се заразени со КОВИД-19, туку да имаат некоја друга болест.
КАКО Е СПРОВЕДНА СТУДИЈАТА?
Научниците од ЦДЦ анализирале над 90 рецензирани студии и публикации за да сфатат колкаво ниво на заштита имаат лицата кои прележале КОВИД-19, а колкаво оние кои не прележале, но се вакцинирале. Поголемиот број студии покажале дека вакцинирањето дава поттик на имунолошкиот одговор кај лица кои прележале корона и дополнително го намалува ризикот од повторна инфекција.
“Иако се чини дека постојат различни докази за заштитата која се јавува по прележувањето во споредба со онаа која се јавува по комплетната вакцинација, постојат значајни имунолошки и епидемиолошки докази дека вакцинирањето по инфекцијата дополнително ја зголемува заштитата од дополнителни болести“, стои во студијата на ЦДЦ.
ДАЛИ ПО ПРЕЛЕЖАНИОТ КОВИД Е ДОВОЛНА САМО ЕДНА ДОЗА ВАКЦИНА?
Дејвид Рубин, педијатар и директор на Детската болница во Филаделфија вели дека ги советува неговите пациенти и членови на семејството кои прележале КОВИД-19 дека е доволно да примат една доза вакцина, за да го зајакнат имунитетот.
“Прележувањето може да се смета како една доза вакцина. Ако сте прележале КОВИД-19, примете барем една доза вакцина“, објаснува тој.
Во септември, повеќе од десет земји, вклучувајќи ги Франција, Германија, Италија и Шпанија, препорачаа лицата кои прележале КОВИД-19 да примат само една доза од вакцина (во случај да се работи за вакцини кои се примаат во две дози).
КЛУЧНИ ЗАКЛУЧОЦИ
ЦДЦ на крајот наведува клучни заклучоци од својата студија:
- Достапните докази покажуваат дека целосно вакцинираните лица и оние претходно инфицирани со SARS-CoV-2 имаат низок ризик од последователни инфекции во тек на најмалку 6 месеци. Податоците во моментов се недоволни за да се одреди прагот на титарот на антитела кој покажува кога поединецот е заштитен од инфекција.
- Имунитетот што го обезбедуваат вакцината и претходната инфекција е висок, но не е целосен (т.е. не е 100%).
- Додека постои широк распон на титарот на антитела како одговор на инфекцијата, вакцинацијата со две дози, особено со mRNA вакцините, обично доведува до подоследен и повисок титар на почетниот одговор на антителата.
- За одредени категории, како што се стари лица и лица со ослабен имунитет, нивото на заштита може да се намали по вакцинацијата и инфекцијата.
- Моменталните докази покажуваат дека нивото на заштита можеби нема да биде исто за сите вирусни варијанти.
- Значајни имунолошки докази и се поголем број епидемиолошки докази укажуваат на тоа дека вакцинацијата по инфекцијата значително ја подобрува заштитата и дополнително го намалува ризикот од повторна инфекција.
