Лицата кои прележале КОВИД-19 и примиле една доза вакцина Фајзер или Модерна, еднакво или дури и подобро се заштитени од некој кој никогаш немал коронавирусна болест и добил две дози вакцина, покажало ново истражување.
Резултатите од истражувањето се објавени во списанието New England Journal of Medicine.
Научниците од Медицинскиот факултет во Њујорк проучувале примероци од крв од 110 лица од кои 43 биле заразени со коронавирус пред вакцинирањето, а 67 не биле никогаш инфицирани. Сите учесници примиле или вакцина на Фајзер или на Модерна, која се темели на нова технологија на информативна РНК.
Тие утврдиле дека испитаниците кои биле заразени со коронавирус пред првата доза вакцина “брзо развиле изедначен, висок титар на антитела за неколку дена по вакцинацијата“.
- Поимот титар означува концентрација на антитела.
Научниците повеќепати земале примероци и утврдиле дека во деновите по првата доза вакцина, нивоата на антитела кај оние кои прележале инфекција со новиот коронавирус биле 10 до 45 пати поголеми отколку кај оние кои не биле заразени со коронавирус пред вакцинацијата.
До моментот кога ја примиле втората доза вакцина, нивоата на антитела меѓу оние кои се опоравиле од КОВИД-19, се уште биле шест пати повисоки отколку кај оние кои не биле заразени.
“Кај лицата кои се опоравиле од КОВИД-19 не е воочен пораст на титарот на антитела по примање на втората доза вакцина“, напишале научниците што покажува дека дополнителната доза вакцина е од одграничена корист за лицата кои ја поминале инфекцијата.
Не е воочена разлика во производството на антитела помеѓу двете вакцини.
Тимот проучувал и дали постојат разлики во несаканите ефекти на вакцината помеѓу 230 испитаници од кои дел прележаке КОВИД-19, а дел не. Не се воочени сериозни нуспојави кои би довеле до хоспитализација.
Лицата кои пред вакцинирањето имале веќе развиен имунитет на коронавирус, почесто имале благи до умерени нуспојави како слабост, главоболка, треска и покачена температура, мускулна болка и болки во зглобовите.
Но, тимот предупредува дека се потребни дополнителни истражувања за тоа да се потврди.
