Сигурно сте забележале дека за време на терапија со антибиотици понекогаш ве мачат тегоби како што се дијареја, мачнина или надуеност. Што е најдобро да се јаде за да се ублажат овие несакани ефекти и да му се помогне на организмот што е можно поскоро да се опорави од болеста?
Земањето антибиотици може да доведе до промена во цревната флора и до појава на дијареја, особено кај децата. Истражувањата покажале дека земањето пробиотици за време на терапијата може да ги намали шансите за оваа појава за 50 отсто. Пробиотиците би требало да се земаат неколку часа пред или после антибиотикот. Исто така, со цел обновување на здравата цревна флора, се препорачува земање пробиотици и по завршувањето на терапијата со антибиотици.
Ферментираната храна како што се јогуртот, кефирот, сирењето, комбухата и природно ферментираната туршија, исто така, ги намалуваат неповолните промени во цревната флора за време на лекувањето со лекови и, исто така, го поттикнуваат нејзиното опоравување.
Храната богата со влакна како што се овошјето и зеленчукот, мешунките и интегралните житарки се од клучна важност за здрав дигестивен тракт, меѓу другото затоа што го поттикнуваат растот и развојот на пријателските бактерии во цревата.
Од друга страна, за време на терапијата со антибиотици би требало да се избегнуваат одделни намирници како што се грејпфрутот и сокот од ова овошје, како и суплементите со високо количество на калциум во себе, со оглед на тоа дека тие влијаат на апсорпцијата на лековите и го пореметуваат нивниот метаболизам.
