Според епидемиолозите и препораката на Европскиот центар за контрола на болести, луѓето треба да држат барем еден метар растојание на отворено и два метри во затворен простор.
Тоа е растојание кое сепак значајно го намалува пренесот на вирусот, бидејќи сега се знае дека за инфекција се потребни големи капки, кои главно се шират со кивање, кашлање и гласно зборување, односно викање. Од овие причини епидемиолозите велат дека социјалната дистанца е една од најважните мерки за заштита од КОВИД-19.
Во повеќе европски земји, последниве денови многу жестоко се полемизира за тоа колкава треба да биде социјалната дистанца која гарантира дека болеста потешко ќе се пренесе.
Во Велика Британија, Шпанија и Италија и натаму се инсистира на растојание од два метри, додека во Франција, Австрија и во Шведска, препорачаната дистанца е еден метар.
ЗОШТО Е ВАЖНА СОЦИЈАЛНАТА ДИСТАНЦА?
Докажано е дека новиот коронавирус се шири по капков пат, а тоа значи дека опасноста од пренос на заразата е поголема ако сме поблиску до лице кое кашла или кива, па дури и ако гласно зборува. Тоа е особено важно во затворени и студени простори, бидејќи студениот воздух е погоден за ширење на вирусот. Стручњаците предупредуваат дека тоа ќе биде многу важно доколку дојде до втор бран наесен.
КОЛКУ ДАЛЕКУ МОЖЕ ДА “ПАТУВА“ КОРОНАВИРУСОТ?
Стручњаците откриле дека вирусните капки при кашлање или кивање, во влажна атмосфера можат да се движат со брзина од 10 метри во секунда. Облакот може да зафати оддалеченост од седум до осум метри, па тоа е причината зошто некои експерти сметаат дека дистанцата од еден или два метри, кога се работи за пренос на болеста, е премала.
Некои истражувања говорат дека дури и кога ветерот е послаб од две милји на час, капките со коронавирус може да преминат пет метри во секунда. Се се тоа причини поради кои и натаму се инсистира на социјална дистанца како мерка на заштита од коронавирусот.
КОЈА ОДДАЛЕЧЕНОСТ НА ЛИЦЕ ОД ЛИЦЕ ЈА НАМАЛУВА ИЛИ ЗГОЛЕМУВА МОЖНОСТА ОД ИНФЕКЦИЈА?
Најновите докази за тоа колкава оддалеченост од лице до лице може да ја зголеми, односно да ја намали можноста за ширење на инфекцијата, деновиве беа објавени во списанието The Lancet. Научниците тврдат дека лицата кои се оддалечени еден метар имаат 2,6 проценти шанса да се заразат, а оние оддалечени два метри само 1,3 проценти.
Тоа значи дека при одржување на растојание од еден метар, од 100 лица ќе се заразат нешто помалку од три лица, а ако оддалеченоста е два метри тогаш тоа ќе бидат малку помалку од едно лице. Доколку не се држи никакво растојание, тогаш ќе се заразат 13 лица, тврдат научниците.
И студија на Светската здравствена организација во која биле анализирани податоци од 172 постоечки студии за начинот на ширење на КОВИД-19, САРС и МЕРС заклучува дека поголемата оддалаченост, односно онаа од околу два метри се поврзува со многу понизок ризик од зараза.
