Зависноста од телевизија кај децата е често последица на недоволната комуникација и нарушување на приврзаноста помеѓу родителите и децата. Препуштањето на децата уште од мали на „телевизиското одгледување“ би можело да има негативни последици врз нивниот емотивен и социјален развој.
Затоа им е потребно водство од возрасни, кои ќе им го ограничат гледањето на одредени содржини, ќе разговараат со нив за вознемирувачките сцени што ги виделе и ќе им го понудат своето објаснување.
За родителите е најважно да знаат дека децата учат најмногу со следење на нивниот пример. Тие, исто така, веќе од 14 месеци го имитираат она што го гледаат на телевизија. Токму затоа одговорноста на родителите е важен фактор во нивното растење.
Важните одлуки, како што е проценката на тоа колку долго и колку често децата треба да гледаат телевизија, треба да ги донесат родителите. Целта би требало да биде минување квалитетно време со децата, а не нивно препуштање на телевизијата. Бидејќи секое дружење, излет, игра и, генерално, секоја комуникација со детето подоцна ќе ви се врати повеќекратно.
Препораки за родителите
Времето кое детето го минува пред ТВ, особено во помлада возраст, ограничете го на еден до два часа дневно;
Јасно нагласете во кои ситуации не се гледа ТВ;
Обратете внимание на програмите и содржините кои ги гледа детето;
Избегнувајте да го користите телевизорот со цел да го привлечете вниманието на вашето дете, во стилот на „дадилка“;
Никогаш не ставајте телевор во детската соба;
Исклучете го телевизорот за време на оброкот и искористете го тоа време за разговор и дружење;
Не дозволувајте телевизијата да биде центар на настаните во вашиот дом;
Преку разговор и коментари на содржините, обидете се што почесто да го следите заедно со децата она што го гледаат;
Потрудете се и самите да гледате што е можно помалку телевизија, бидејќи децата најмногу учат додека ве гледаат вас.
