Посебно внимание при високи температури треба да обрнат чувствителните лица, односно децата, трудниците, постарите лица, како и оние кои патат од хронични болести затоа што имаат намалена способност за прилагодување. За време на врелите денови може да дојде до прегревање на организмот, а симптомите се вртоглавица, слабост, вознемиреност, интензивна жед или главоболка. Доколку имате некои од овие симптоми веднаш преминете во разладена просторија и измерете ја телесната температура. Напијте се неколку голтки вода или овошен сок на собна температура. Појдете на лекар ако забележите невообичаени симптоми или ако тие долго траат. Ако, пак, кај некоја личност на која и помагате забележите топла, сува кожа, бладање, појава на грчеви или несвестица, односно губење на свеста веднаш повикајте медицинска помош. Додека да дојде помошта еве што треба да направите – разладете ја личноста со ладни облоги, дајте и течност и ослободете ја од вишокот облека. Во случај на прегревање кај деца може да дојде до топлотен удар кој може да има фатални последици, затоа е важно да се препознаат симптомите:
- Раздразливост;
- Малаксаност, поспаност;
- Дезориентираност;
- Зголемена температура;
- Повраќање;
- Конвулзии;
- Несвестица.
Ако забележите некои од овие симптоми, важно е веднаш да се реагира!
- Детето да се тргне веднаш од, на пример, прегреаниот автомобил.
- Појдете во лад, под сенка, на тој начин температурата на телото ќе се намали.
- Слечете го детето. Тоа ќе помогне да се разлади и кожата да му дојде во директен контакт со воздухот.
- За телото побрзо да се разлади потребно е детето да го топите со вода, односно да го разладите така што ќе натопите пешкир со млака вода и со него ќе го освежите.
- Се препорачуваат ладни облоги на вратот, препоните и под пазувите. Таму има крвни садови кои се најблизу до кожата, па така се забрзува намалувањето на температурата на целото тело.
- Од голема важност е детето да не дехидрира. Давајте му течности!
