Чувствувате мачнина, жарење во желудникот и честа надуеност на стомакот? Знаците поврзани со гастритисот може да варираат, но овие неколку симптоми упатуваат на можно постоење на гастритис.
Мачнина и повраќање
Поголемиот број болни чувствуваат печење и/или жарење во пределот на желудникот, мачнини, нагон на повраќање, повраќање, надуеност, подригнување, киселини… И додека едни се жалат на силни болки, други, пак, болките ги опишуваат повеќе како чувство на нелагодност.
Тегоби по оброк
Симптомите некогаш се повеќекратни, побројни, посилни кога пациентот подолго време не внесува храна. Некогаш тегобите се ретки или се појавуваат и засилуваат по консумирањето на храна. Во секој случај не постојат карактеристични знаци кои во целост се еднакви за секој болен.
Блага диспепсија
Кај гастритисот може да се јави и брзо чувство на ситост и надуеност, како и потемна столица. Кај лицата кај кои гастритисот е предизвикан од бактеријата хеликобактер пилори често немаат никакви симптоми освен лесна диспепсија (тешкотии со варењето).
Болки и подригнување
За гастритис со намалена желудочна киселина карактеристично е чувство на тежина за време на оброкот или веднаш по јадењето, болки и подригнување. Овој облик е почест кај лица по 45-тата година.
Надуеност и киселини
Кај младите лица често се јавува засилено лачење на желудочна киселина при тоа предизвикувајќи болка во желудникот на празен желудник, чувство на надуеност и киселини.
