Миењето на рацете е една од најефикасните мерки за борба против ширењето на заразни болести, особено коронавируси и грип. Респираторни вируси како КОВИД-19 се шират кога слуз или капки од вирусот влегуваат во телото преку нос, грло или очи, а најчесто тоа се случува преку нашите раце. Со рацете обично ја пренесуваме болеста од една на друга личност. Со доаѓањето на есента, почетокот на учебната година и одењето во градинка, правилното миење на рацете е една од најважните хигиенски мерки што родителите, воспитувачите и наставниците ги охрабруваат децата да ги преземат. Но, правилното миење на рацете честопати е непознато и за возрасните.
Истражувања направени во светот покажале дека само до 34% од луѓето правилно ги мијат рацете во клучни моменти: по користење на тоалет, по бришење на задникот на детето и пред секој контакт со храна, предупредуваат епидемиолозите.
Палците, врвовите на прстите и кожата помеѓу прстите најчесто се пропуштаат убаво да се измијат, потеницраат епидемиолозите. Со рацете допираме речиси се. Кога здрава личност со рацете допре некоја загадена површина, го пренесува вирусот на рацете, а потоа, допирајќи ги очите, носот или устата се заразува сама себе.
“Пред нас е предизвик да правилното миење на рацете од добра идеја прерасне во секојдневно однесување во домот, во училиштата, градинките, на работното место“, велат по епидемиолошките служби.
Како правилно да се измијат рацете?
Внимателното миење во пет чекори ќе ги отстрани сите траги од нечистотија и вируси од вашите раце.
Чекор 1: Навлажнете ги рацете со проточна вода.
Чекор 2: Нанесете доволно сапун да ги покрие влажните раце.
Чекор 3: Темелно тријте ги сите делови и површини на рацете – вклучувајќи го и задниот дел на рацете, помеѓу прстите и под ноктите – најмалку 20 секунди.
Чекор 4: Исплакнете темелно со проточна вода.
Чекор 5: Исушете ги рацете со чиста крпа или крпа за еднократна употреба.
Треба ли рацете да се мијат исклучиво со топла вода?
И студената и топлата вода се подеднакво ефикасни во уништување на вирусот – сè додека користите сапун!
“Миењето со вода и сапун е единственото правилно миење. Докажано е дека миењето раце само со вода нема ни приближен ефект во спречување на ширењето на заразни болести. Миењето на рацете со вода и сапун ги раствора маснотиите и нечистотијата што ги носат повеќето микроорганизми и ги остава рацете чисти и миризливи – советуваат епидемиолозите.
Што ако нема сапун?
Ако во моментов не се достапни сапун и проточна вода, средства за чистење на рацете кои содржат најмалку 60 проценти алкохол се најдобрата замена. Но, важно е да ги измиете рацете со вода и сапун што е можно поскоро и во меѓувреме да избегнувате контакт со луѓе и површини. Средството за чистење на рацете на база на алкохол го убива коронавирусот, но не ги убива сите видови бактерии и вируси. На пример, релативно е неефикасно против норовирус и ротавирус.
Дали децата треба да користат алкохолен дезинфициенс за рацете?
“Со цел да се спречи пренесувањето на КОВИД-19, многу е важно да се одржува хигиената на рацете, но поради честото миење и со употреба на гелови и спрејови кои содржат алкохол, се оштетува природната заштитна бариера на кожата и се појавуваат воспалителни промени и егзема на кожата. Препорачливо е децата да не користат алкохолни средства за дезинфекција, туку посебно благи средства за дезинфекција врз основа на натриум хипохлорит, што има широк спектар на ефекти врз микроорганизмите, а во исто време нема иритирачки ефект и не ја оштетува епидермалната бариера на кожата. Покрај тоа, на децата и на сите со почувствителна кожа им се препорачува да користат течни сапуни за миење на рацете, кои се подеднакво ефикасни, но не ја сушат кожата и ја зачувуваат бариерата на кожата – нагласуваат дерматовенеролозите.
Дали рацете треба да се исушат по миењето?
“Рацете треба да се мијат најмалку 20 до 30 секунди, по што треба добро да се исушат бидејќи вирусите полесно се пренесуваат преку капки“, потеницраат лекарите.
Имено, разни честички полесно се шират од влажна отколку од сува кожа, па затоа сушењето на рацете е многу важен чекор. Хартиените крпи се најефикасни за нивно отстранување без да се шират на други површини.
