Желудникот не поднесува стрес, алкохол, пушење, премногу обилни, пресолени оброци и индустриска храна затоа што го отежнуваат неговото функционирање и предизвикуваат тегоби. Заради тоа, пред се, потребно е да се елиминираат овие фактори и да се сменат навиките во исхраната, а доколку одвреме-навреме си давате оддишка и се препуштате на хедонизмот, применете ги овие практични совети кои ќе ги решат дигестивните проблеми.
Ублажете ги последиците од стрес
Кога и да сте во можност одвојте време за себе и поминете го во пријатно опкружување, прошетка, читање, разговор со драги лица. Ќе ви помогнат и чаеви и тинктури од лаванда, босилек, хмељ, нане, валеријана, кантарион, маточина, кои имаат смирувачко дејство.
„Одморете“ го желудникот
Доколку почувствувате дигестивни тегоби прекинете го внесот на храна и дозволете му на желудникот малку да се „одмори“, обидете се да издржите барем четири-пет часа без јадење. За тоа време консумирајте чаеви за олеснување на тегобите и обавезно пијте ги во мали голтки.
Масирајте го стомакот
Со нежни кружни движења во насока на стрелките на часовникот масирајте го стомакот околу пет минути. Така ќе го покренете и забрзате движењето на храната низ дигестивниот систем и ќе ги олесните тегобите со варењето.
Топли облоги
Загревајте го стомакот со шише со топла вода или термофор, проверен лек за ублажување на желудочните тегоби. Се препорачува и облог од камилица кој се прави на следниот начин: сварете појак чај, оставете го да се олади малку, натопете пешкир, ставете го на стомакот и држете додека не се излади. Повторувајте ја постапката додека не почувствувате олеснување.
Благотворна мешавина
Коријандерот содржи етерично масло кое го потпомага создавањето на желудочните сокови и ги смирува грчевите, во стомакот, кимот го поттикнува исфрлањето на гасовите, босилекот ја одржува рамнотежата во цревната флора, а нането го опушта желудникот и цревата, ги намалува грчевите и мачнината, како и ја стимулира продукцијата на желудочни сокови. Ако немате време да правите чај, грицкајте семе од ким додека не почувствувате олеснување.
Тинктури за прва помош:
Доколку сте склони на стомачни тегоби, направете тинктури кои секогаш ќе ви бидат при рака, а во случај на тегоби ќе имате исклучително брзо и поволно дејство.
- Од маточина: 20 г свежо исушени листови прелијте со десилитар 70% алкохол и оставете да отстои четири седмици. Земајте 20-30 капки на ден.
- Од ѓумбир: 200 г корен прелијте со литар 60% алкохол и оставете го да отстои 21 ден на топло и темно место. Се земаат 10-20 капки пред јадење.
