Прим. Д-р Лидија Бисеркоска-Атанасовска: Загрижувачки ли се кожните промени во бременоста?

Пишува: Прим. д-р Лидија Бисеркоска- Атанасовска

специјалист – дерматовенеролог

Многу од промените на кожата во бременоста може да предизвикаат вознемиреност, бидејќи влијаат на изгледот, но најголем дел од промените се безопасни по здравјето на мајката и детето и истите исчезнуваат по породувањето.

КАКВИ ПРОМЕНИ НАСТАНУВААТ?

Бременоста влијае на промената на женското тело на повеќе начини. Покрај промената во тежината, најголем дел од визуелните промени се оние на кожата, косата и на ноктите. Многу од овие промени може да предизвикаат вознемиреност, бидејќи влијаат на изгледот. Најголем дел од промените се безопасни по здравјето на мајката и детето и истите исчезнуваат по породувањето. Кога ќе забележите промена на вашата кожа, коса и нокти, ве молиме да го консултирате вашиот дерматолог.

Овие се најчестите промени и начини на лекување

КОЖАТА И БРЕМЕНОСТА

Промените на вашата кожа може да имаат многу причини. Некои од нив се поврзани со хормоналните промени што се појавуваат за време на бременоста. Другите кожни проблеми може да постоеле уште пред да останете бремена и да се променат за време на бременоста.

Кожни промени за време на бременоста се: појава на стрии, појава на папиломи, промени во растењето на косата, акни и себореја, проширени вени и капилари, појава на пигментни флеки и потемнување на младежите.

ШТО СЕ СТРИИ?

Стриите се линеарни промени кои се јавуваат на дојките, стомакот, на колковите. Тие почнуваат како црвени или пурпурни линии и со текот на времето стануваат бели и атрофични (како хартија од цигари) лузни. Стриите се многу чести во бременоста, од 50 до 90% од бремените жени ќе добијат неколку. Многу ретко стриите може да дадат симптом, односно чувство на горење или чешање. Причините поради кои се добиваат, односно точниот механизам сe уште е непознат. Се претпоставува дека една од причините е брзото покачување на телесната тежина и постепеното чешање на кожата, иако и ова не е докажано. Стриите се почесто се гледаат во повеќето членови од една фамилија. За појавата на стриите голема улога имаат генетските фактори, почесто кај млади жени и кај жени со прекумерна телесна тежина. Тие најчесто се појавуваат во 25. недела од бременоста, иако некои жени ги добиваат и порано. Поголемиот дел од стриите избледнуваат по породувањето.

ПОЈАВА НА ПАПИЛОМИ И ФИБРОМИ

Овие промени се многу мали и вообичаено се појавуваат под пазувите и под дојките. Појавата на ваквите промени се должи на дејството на хормоните на места кои се подложни на механичка иритација. Истите промени може да исчезнат по раѓањето. Доколку се уште постојат, треба да се консултирате со вашиот дерматолог.

ПРОМЕНИ ВО РАСТЕЊЕТО НА КОСАТА

За време на бременоста растењето на влакната е забавено. Оваа причина доведува до истанчување на влакното и проретчување на косата. Три месеци по породувањето циклусот на влакното се нормализира, доведувајќи до поинтензивно проретчување на влакното. Ова се нарекува телоген ефлуфиум. Овој процес трае од 6 до 12 месеци, но потоа веднаш се нормализира и е исто како пред бременоста.

Бремените жени може и да забележат растење на влакна на места типични за мажи, во пределот на брадата. Оваа појава повторно се должи на промената на хормоните. И секако, и оваа промена поминува неколку месеци по породувањето.

ПОЈАВА НА АКНИ И СЕБОРЕЈА

Промената на хормоните за време на бременоста може да ја подобрат состојбата со акните. Но кај некои жени целата состојба може да биде и полоша. За време на бременоста крвната циркулација на кожата е зголемена и дава чувство на лице што свети, или уште наречен и како труднички сјај. Зголемената продукција на хормоните ги стимулира жлездите да продуцираат себум.

ПРОШИРЕНИ ВЕНИ И КАПИЛАРИ

Промените во организмот за време на бременоста може да доведат до појава на оток на кожата околу зглобовите, може да почувствувате тежина во нозете и исцрпеност. Во подоцнежниот стадиум е можна појава на проширени вени на нозете. Доколку во вашата поблиска фамилија има историја на проширени вени или појава на тромбофлебит или флеготромбоза, потребно е да го консултирате вашиот доктор. За да ја подобрите циркулацијата на нозете е потребно да ги подигнувате нозете повисоко. Чекорењето ја подобрува циркулацијата преку вашата мускулна пумпа, додека седењето и стоењето негативно влијаат на состојбата. Еластични хулахопки или чорапи треба да се носат доколку почувствувате дека вашите нозе почнуваат да отекуваат.

ПОЈАВА НА ПИГМЕНТНИ ФЛЕКИ И ПОТЕМНУВАЊЕ НА МЛАДЕЖИТЕ

Зголемувањето на пигментацијата е многу почесто кај потемни жени. Започнува со потемнување на брадавиците, на гениталиите и линеа алба (т.е линијата на стомакот). Кај некои жени и претходни лузни може да потемнат. На лицето може да се појават и потемни флеки кои се нарекуваат мелазми или хлоазма. Овие промени се влошуваат при сончање, а може да се намалат со користење на кремови со заштитен фактор (СПФ 50) против УВА и УВБ. Вообичаено симптомите престануваат по породувањето, или доколку и понатаму се присутни консултирајте дерматолог за нивно правилно третирање.