ПРИТИСОК ВО ГРАДИТЕ
Важен е и чест симптом кој со право најчесто се поврзува со болести на срцето и секогаш предизвикува вознемиреност и страв. Меѓутоа, овој симптом може да се поврзе и со болести на белите дробови, желудникот и мускулно-скелетниот систем на торакалниот ѕид, но може да биде и знак за анксиозност и напади на паника, кои се изразено вознемирувачки и драматични за личноста што ги доживува. Најчесто се презентира со затегнатост во пределот на грлото како чувство на гушување, потење, силно чувство на страв и паника со чувство на срцебиење во траење од 10-тина минути.
Срцевиот удар како причина за притисок во градниот кош се манифестира со силна и интензивна болка која трае повеќе од 20 минути, најчесто зад градната коска или во левата страна на градниот кош како чувство на стегање и како градниот кош да е премал. Може да започне и во горниот дел на стомакот или помеѓу лопатките и да се шири кон вратот, вилицата или левото рамо и раката.
Болката се интензивира при напор, а покрај симптомот на притисок се јавуваат и придружни симптоми како препотување (видлива пот на челото), отежнато дишење, забрзано дишење, бледило.
Мускулно-скелетната болка на торакалниот ѕид се интензивира при движења на градниот кош или притисок во областа каде што се јавува болката, нема други придружни симптоми и најчесто се јавува по интензивна физичка активност.
Притисокот во градниот кош кој доаѓа од дигестивниот систем (желудникот) се манифестира со печење, во пределот на долниот дел на градната коска и во лажичката, а може да се прошири и кон грлото, со чувство на киселост во устата, чувство на враќање на храната (регургитација), а многу често се јавува навечер поради лежечката положба на телото и после обилен оброк непосредно пред спиење.
Симптоми кои би можеле да укажуваат на состојба опасна по живот вклучуваат:
- Чувство на стегање зад градната коска (чувство дека градите се премногу мали!)
- Ширење на болка во раката, долната вилица
- Обилно потење (“грашок“ од пот на челото)
- Забрзано чукање на срцето (тахикардија)
- Збунетост или губење на свеста
- Ненадеен страв
- Отежнато дишење или голтање
- Вртоглавица
- Осип или нагло чувство на чешање со изненадна отеченост на лицето, грлото или усните (алергиска реакција)
БОЛКА ВО ОКОТО
Како симптом не мора да значи дека се работи за болести на очите, бидејќи често се јавува како последица на воспаление на синусите, мигрена, потоа тензиска главоболка, чија причина е седечката положба на телото како доминантен начин на животот на современиот човек. Болката во пределот на очите може да настане како резултат на невралгија (болести на нервите кои ја инервираат областа околу окото), а настануваат како резултат на воспалителни или механички причини и се манифестираат како молскавична, многу интензивна и непријатна болка.
Болката во окото како последица на очно заболување најчесто се јавува како последица на конјунктивитис (воспаление на предниот дел на окото), па наместо болка, најчесто се јавува чувство на печење, стегање и чешање на окото, со присуство на секрет и црвенило, утринска лепливост на окото, но со непроменет вид.
Многу интензивна и силна болка во окото може да се појави при нагло зголемување на очниот притисок (акутен глауком), а симптомите потоа се многу лош вид, силно црвенило на окото, а при затворање на очните капаци, окото е тврдо како камен под притисок и во овој случај е потребна итна офталмолошка помош и терапија . Причината за болка во окото често се јавува како резултат на механички гребнатини на површината на окото (ерозија на рожницата), на пример, спиење со леќи, случајни гребнатинки и потоа се јавува изразено чувство на туѓо тело во окото, чувствителност на светлина, црвенило на окото.
Исто така, “заморот во очите“ како резултат на рефрактивни грешки, најчесто астигматизмот може да предизвика болка во окото и главоболка, бидејќи со стискање на очните капаци лицето се обидува да го изостри видот, а таквиот долг напор често резултира со болка во очите и главоболка.
Предупредувачки знаци:
- Зацрвенето око
- Губење на видот, нарушувања на видното поле
- Испакнување на очното јаболко на едното око
- Ненадејна силна болка во пределот на очите
- Очното јаболко на притисок е тврдо како камен
ВИСОКА ТЕЛЕСНА ТЕМПЕРАТУРА
Како симптом најчесто е последица на инфективни болести, а со покачена телесна температура доаѓа и чувство на слабост, болка во телото, понекогаш придружена со треска и морници. Високата температура над 39°C може да доведе до сериозни здравствени компликации, особено кај малите деца, постарите и хроничните пациенти, па затоа е потребна совесна примена на процедури за нејзино намалување со внимателно следење на пациентот.
Промените кои упатуваат на потешка форма на болест, кога треба да побарате медицинска помош без одлагање, се; отежнато и забрзано дишење, нарушувања на видот, општа лоша состојба особено кај малите деца, осип на кожата, силни прогресивна главоболка со мачнина и повраќање со вкочанетост на вратот и чувствителност на светлина.
Затоа, ако по 3-4 дена високата телесна температура не може сама да се намали и ако симптомите на болеста се влошат со отежнато дишење и голтање, тогаш неопходно е без одлагање да се побара лекарска помош.
АКУТНА БОЛКА ВО СТОМАКОТ
Со оглед на тоа што абдоминалната празнина, вклучително и карлицата, содржи голем број на органи и органски системи, нормално е поголемиот дел од здравствените проблеми да се појават токму во овој дел. Силната абдоминална болка која се појавува ненадејно речиси секогаш укажува на значителен проблем и бара внимателен преглед и не смее да се игнорира.
Постојат различни видови на болка во стомакот, во зависност од органот или дел од абдоменот што е зафатен.
Висцералната болка доаѓа од органите во абдоминалната празнина (наречени висцерални органи). Нервите на абдоминалните органи реагираат на истегнување на органите (како што е црево проширено од гасови) или на контракции на околните мускули, поради што таквата болка е обично нејасна, тапа и предизвикува гадење. Тешко е да се одреди местото на болката.
Болката во горниот дел на стомакот е резултат на нарушувања во органите како што се желудникот, дуоденумот, црниот дроб и панкреасот. Болката во средишниот дел на абдоменот (околу папокот) е предизвикана од нарушувања на структурите како што се тенкото црево, горниот дел од дебелото црево и слепото црево, додека болката во долниот дел на абдоменот е последица на нарушувања на долниот дел од дебелото црево и органите на генитоуринарниот тракт.
Соматската болка доаѓа од мембраната (перитонеумот) што ја обложува абдоминалната празнина (перитонеалната празнина). За разлика од нервите во висцералните органи, перитонеалните нерви реагираат на иритација (како што се инфекција, воспаление, крварење). Соматската болка е остра и лесно се одредува локацијата на болката, лицето зазема одредена положба што ја олеснува болката.
Предупредувачки знаци на абдоминална болка се;
- Тешка болка, заземање положба на телото што ја намалува болката – мирување,
- Тврд стоначен ѕид
- Знаци на шок (на пример, забрзан пулс, низок крвен притисок, потење и конфузија)
- Знаци на перитонитис (на пример, постојана болка што се влошува со движење на телото и/или болка што се влошува со нежен допир)
- отекување на стомакот
Лицата кои имаат знаци на предупредување треба веднаш да побараат лекарска помош.
