Последниве години големо внимание е посветено на улогата на диетата кај мајките (ограничување на исхраната за време на бременоста и лактацијата) со цел да се превенира атопискиот дерматитис и пречувствителноста на храна.
Најсеопфатна информација доаѓа од студија во која се следени 288 американски деца од раѓањето до четвртата година од животот, а 125 од овие деца и до седумгодишна возраст.
Дел од мајките и новороденчињата биле рандомски вклучени во „превентивната“ група испитаници каде што мајките избегнувале: кравјо млеко, јајца и кикиритки за време на третото тримесечие од бременоста и за време на лактацијата; требало да употребуваат казеин – хидролизатна формула како дополнување на доењето или како замена на доењето; требало да избегнуваат двање на сите видови цврста храна на своите бебиња во траење од шест месеци и да избегнуваат исхрана на нивните деца со одредени алергогени прехранбени продукти во текот на 24 месеци.
Друг дел од мајките и нивните новороденчиња ја сочинувале „контролната“ група каде што не се спроведени погоре опишаните профилактилки мерки. По седум години, единствениот атописки параметар кој бил различен помеѓу групите биле намалената преваленција на пречувствителност на храна, особено на млеко кај „превентивната“ група испитаници.
Не е забележана разлика во преваленцијата на атопискиот дерматитис, астмата, алергискиот ринитис, сензибилизацијата на храна или на позитивните тестови на инхалаторни алергени помеѓу двете групи. Други истражувања со деца покажале дека има директна корелација помеѓу бројот на цврсти прехранбени продукти коишто се даваат пред шестмесечна возраст и преваленција на атописки дерматитис пред втората година од животот.
Овие и други студии укажуваат на потенцијалната улога на алергијата на храна во развојот на АД и потенцијалната корист од раното избегнување на одредени прехранбени продукти кај високоризичните новороденчиња.
