“Логоритамската крива на бројот на регистрирани случаи во земјава, полека почнува да спласнува, ако се смета од 23 март до денес. Значи ли тоа дека успеваме полека да ја контролираме инвазијата со КОВИД-19? Се гледа ли светло на крајот од тунелот?“, напиша доцна синоќа на својот Фејсбук профил, поранешниот министер за здравство и професор по епидемиологија, д-р Драган Даниловски.
На неговите стручни претпоставки се надополнува и фактот дека споредбено со земјите не само во регионот, туку и во светски рамки, земјава е со најнизок просек на заразени и починати од КОВИД-19.
Според официјалните споредбени анализи на многу светски центри, а ако се земе предвид дневната евиденција на новозаразени и бројот на починати од коронавирусот, Северна Македонија е во групата на земји кои состојбата со КОВИД-19 ја држат под контрола.
Заклучно со 27 март, во земјава пријавени се 241 случај на пациенти со коронавирус. Највисока кумулативна инциденца на 100.000 жители се регистрира во Дебар со 162,1 заболени на 100.000 жители, а во Скопје инциденцата е 23,0 на 100.00 жители, додека во Штип инциденцата на 100.000 жители е 15,2.
Во однос на дистрибуцијата по пол, регистрирани се 116 машки и 125 женски лица. Возраста на заболените се движи од 2 до 91 години (просек – 43,7 години). Најголем број на заболени се на возраст од 30-39 години – 56 (23,2%) и 50-59 години – 51 (21,2%) каде е регистрирана и највисока специфична инциденца од 18,3/100.000 жители
Првиот случај на пациент заразен со коронавирус е регистриран во 9-та недела, а од 11-тата недела во 2020 континуирано се регистрираат нови потврдени случаи. Највисок број на пријавени случаи на дневно ниво е регистриран на 21 и 24.03.2020.
Зошто и натаму е неопходна потребата од заштита и почитување на мерките за спречување на ширење на вирусот, проф. д-р Даниловски вели:
“Вирусот се одржува во воздухот дури 3 часа! Значи, се шири и аерогено (низ воздухот)! Досега се сметаше дека тоа е малку веројатно. Ова најново сознание, од една страна, ја објаснува „филмската“ брзина со која се рашири низ светот, а од друга страна, значи итно менување на стратегијата за лична заштита! Веќе не знаете кој поминал пред вас по улица. И дали, можеби, нема да поминете низ облак од вируси, кои си лебдат во воздухот цели три часа. Особено ако времето не е ветровито…
Затворени простории не треба ни да спомнеме…
Значи, седете дома уште поригорозно. И носете маски, какви-такви, дури и кога одите по улица. Ова не значи дека ви се забранети прошетки низ природа! Напротив! На организмот му е потребен свеж воздух. Но, одберете место кајшто нема луѓе или ги има многу малку. И проветрувајте ги што почесто просториите на својот дом“, апелира проф. д-р Даниловски.
КАКВА Е СОСТОЈБАТА СО КОВИД-19 ВО СВЕТОТ:
Согласно последните податоци објавени од Светската здрасвтвена организација заклучно со 27.03.2020:
Број на потврдени случаи на глобално ниво – 509.164 (46.484 нови)
Број на смртни случаи на глобално ниво – 23.335 (2.501 нови)
Број на зафатени земји/ територии – 201
- Европски Регион на СЗО
- Потврдени случаи – 286.697 (36.414 нови)
- Смртни случаи – 16.105 (2.155 нови)
- Регион на СЗО Западен Пацифик
- Потврдени случаи – 100.018 (960 нови)
- Смртни случаи – 3.567 (27 нови)
- Регион на СЗО Југо-источна Азија
- Потврдени случаи – 932 (396 нови)
- Смртни случаи – 105 (26 нови)
- Источно-Медитерански Регион на СЗО
- Потврдени случаи – 35.249 (807 нови)
- Смртни случаи – 336 (174 нови)
- Регион на СЗО Америка
- Потврдени случаи – 81.137 (5.425 нови)
- Смртни случаи – 1.176 (111 нови)
- Африкански Регион на СЗО
- Потврдени случаи – 2.419 (482 нови)
- Смртни случаи – 39 (8 нови)
