Пишува: Александра Стојановска/saska@panacea.mk
Денес во Струга и официјално почна 23-тиот по ред стручен симпозиум на Здржението на лекари Албанци во Македонија. На дводневната средба на која се присутни над 750 лекари од земјава, и од регионот ќе бидат опфатени неколку стручни области, со најголем акцент на кардиологијата.
Според претседателот на Здружението, проф. д-р Невзат Елези овој состанок на лекарите од сите бранши им обезбедува размена на искуства, споделување на новини во медицината, како и промоција на млади лекари.
“Во нашето Здружение нема подгранки, хирурзи, педијатри, уролози. Практично цела фела е собрана на едно место, во Здружение на лекари Албанци на Македонија. Но, на ваквите состаноци освен нашите членови присуствуваат и гости од секаде. Имаме колеги од Србија, Хрватска, Црна Гора, Косово, Албанија, од сите поранешни југословенски републики. Здружението практично ги опфаќа сите лекари од регионот. Секоја година, на 7-ми април Претседателството зазема став кои теми ќе се обработуваат на следниот симпозиум, на професионалните средби. Оваа година првата тема е кардиологијата, втората е во насоки на мотото на Светска Здравствена Организација – здравје за сите и секаде и третиот дел се слободни теми каде им даваме можност на сите специјализанти и млади лекари со постер презентации да ги објават своите трудови. Веќе 23 години по ред се собираат лекари од сите бранши. Секако, овие средби се пред се размена на искуство, што е многу важно во медицината. Но, морам да нагласам тоа е секогаш со помош на фармацевтските компании кои ни излегуваат во пресрет и ни овомозжуваат да се собереме во вака огромен број. Бројот на посетители е огромен, над 750 лекари се присутни тука денес во Струга и тоа ме прави исклучително горд“, ни изјави проф. д-р Елези веднаш по отворањето на професионалната средба.
На свеченоста, присуствуваа и заменик министерот за здравство д-р Асим Муса, како и почесниот и прв претседател на Здржението на лекари Албанци на Македонија, проф. Агим Рамадани.
Ова здружение функционира во земјава веќе 24 години, и секоја година традиционално одржува ваков професионален состанок. Единствено, во 2001 година средба на лекарите не е одржана. Гости предавачи се и лекари Македонци.
“ Преку нашата веб страна која функционира на три јазика, (македонски, албански и англиски јазик) самите колеги Македонци се заинетерсирани и испраќаат свои трудови. Трудовите потоа одат во рецензиона комисија која е тајна. Како што се бираат предавањата, значи беа разлика од која националност е, добрите предавања секогаш се објавуваат и тоа преку орална презентација. Тоа е всушност и целта, бидејќи многу колеги Македонци во соработка со специјализанти Албанци нивните искуства ги пренесуваат и на нашите собири. Овој состанок практично е мултидисциплинарен и мултијазичен“, истакна проф. д-р Елези.
