Најновото британско истражување ги потврдило претходните, кои предупредуваат дека музичарите може да имаат сериозни проблеми со слухот. Оние во музичката индустрија имаат многу поголем ризик од појава на зуење во ушите од луѓето кои работат во тивко опкружување, открива новото истражување.
Луѓето со зуење во ушите слушаат и пиштење, зуење или крчење и кога нема надворешни дразби.
„Нашето истражување покажува дека луѓето кои работат во музичката индустрија се во голема опасност од развој на тинитус, а тој ризик во голем дел се случува заради изложеноста на бука. На музичарите им се советува да носат некој вид заштита кога нивото на врева ќе надмине 85 децибели, што е отприлика еквивалентно на вревата која ја создава поминувањето камион“, вели Сем Куз од Центарот за аудиологија на Универзитетот во Манчестер.
Во оваа студија истражувачите анализирале дигитална база на податоци од 23 000 луѓе во Велика Британија за да ја споредат стапката на тинитус меѓу оние кои работат на високо ризични професии за оштетување на слухот, како градежништво, земјоделство и музика, со луѓе со низок ризик, на пример, оние во финансискиот сектор.
Луѓето во музичката индустрија вклучително и музичарите, продуцентите и другите лица имале речиси два пати поголема можност да развијат тинитус од оние во финансиската индустрија, покажало истражувањето објавено во магазинот Trends in Hearing.
Ризикот е еднаков меѓу сите музичари без оглед на жанрот, дури тоа важи и за класиката. На пример, на почетокот на оваа година Кралската опера ја загубила жалбата заради оштетувањето на слухот што го претрпел еден свирач на виола на проба на Вагнерово дело.
„Повеќето озвучени концерти надминуваат 100 децибели, што значи дека музичарите не би требало да бидат изложени на тоа ниво на врева подолго од 15 минути без соодветна заштита. Меѓутоа досегашните истражувања покажуваат дека само шест отсто од музичарите носат заштита за слухот“, вели Куз.
