Секој треба да биде свесен за сигналите што ги испраќа кожата, па затоа ви пренесуваме кои се најчестите кожни проблеми кои се јавуваат кога нешто не е во најдобар ред со телото.
Темни дамки
Темните дамки кои наеднаш се појавуваат може да бидат знак на инсуфиценција на надбубрежните жлезди, односно Адисонова болест (ретка хронична болест, која се појавува како последица на колапс на надбубрежните жлезди). Луѓето со оваа болест имаат болки во мускулите и зглобовите, а го губат и апетитот. Крвниот притисок и нивото на шеќер во крвта им е низок. Сите овие симптоми може да бидат многу опасни, па затоа не чекајте, одете на лекар.
Бели дамки
Болеста при која кожата ја губи пигментацијата се нарекува витилиго. Таа се развива кога имуниот систем ги убива клетките наречени меланоцити, предизвикувајќи при тоа делови од кожата да попримат бела боја бидејќи клетките повеќе не произведуваат пигмент. Витилигото може да биде последица на адренална инсуфициенција. Најдобро е да се направи проверка кај ендокринолог или дерматолог.
Осип
Каков било вид на ненадеен осип на кожата е знак дека нешто не е во ред. Причина може да биде алергија на храна, домашни хемикалии, лекови… Најдобро е да посетите доктор, бидејќи секоја алергиска реакција може да има сериозни последици.
Отоци (едем)
Доколку секојдневно имате отоци, треба да посетите ендокринолог, бидејќи може да бидат знак за хипотиреодизам, односно намалување на функциите на штитната жлезда што може да биде последица од недоволно лечење на хормоните на штитните жлезди или недоволна работа на хормонот на штитната жлезда на ткивата.
Голем број нови бенки
Постојат многу причини поради кои се појавуваат бенки. Основна е наследната. Доколку ги имаат вашите родители, голема е веројатноста дека и вие ќе ги имате. Друга причина може да биде и поради претерано изложување на ултравиолетови зраци или хормонална нерамнотежа. Во повеќето случаи се безопасни. Но, ако нивниот број нагло порасне и ако станат болни или ја менуваат големината и бојата, тоа е причина да посетите лекар.
Акни
Постојат многу причини поради кои се појавуваат акни: кожата лачи премногу маснотии, хормонална нерамнотежа… Акните секогаш се последица. Секако, морате правилно да ја негувате кожата, но за да се ослободите од акните, мора да ја дознаете причината за нивното појавување.
Лупење на кожата
Причина за лупење на кожата може да биде недостаток на витамини, хормонален дисбаланс, алергиски реакции, себореичен дерматитис, псоријаза и други заболувања. Ако лупењето е интензивно и проследено со други симптоми, може да биде знак дека сериозно сте болни. Задолжително одете на преглед.
Претерано потење
Ако се наоѓате во добро проветрена просторија со оптимална температура и не сте нервозни, тогаш не треба да се потите како да сте трчале. Ова може да биде знак за Базедова болест. Станува збор за автоимуна и ендокринолошка болест во чија основа се наоѓа специфично пореметување на тироидната жлезда. Останати симптоми се и губење на тежина, неподнесување на топлина, топла и влажна кожа…
