Уште во 2020 година, ако луѓето изгубеа чувство за мирис, беше веројатно дека се заразиле со коронавирус. Поновите варијанти, вклучувајќи ги и подваријантите на омикрон, не го предизвикуваа често овој симптом.
Меѓутоа, губењето на мирисот може да се врати, бидејќи подваријантата BA.5, која лесно може да го избегне имунолошкиот одговор на телото, стана најчеста причина за нови случаи.
Валентина Парма, психолог во Центарот за хемиски сетила Монел во Филаделфија, која работи со ковид пациенти, вели дека гледа се повеќе луѓе со губење на мирис во споредба со почетокот на годината.
“Кога ќе го примениме тестот за мирис, гледаме дека околу 25 проценти од луѓето имаат нарушено, ослабено сетило за мирис, што не е мала бројка“, додава таа.
Д-р Парма нагласува дека бројот на луѓе кои пријавуваат губење на мирис е “значително помал“ отколку кај делта варијантата, која беше доминантна во 2021 година.
Не е јасно зошто одредени варијанти предизвикуваат губење на мирис повеќе од другите. Меѓутоа, истражувањата сугерираат дека до губењето на мирис доаѓа кога вирусот ги инфицира нервните клетки во носот.
