Бронхиектазиите претставуваат една од најзапоставените болести во респираторната медицина и покрај тоа што резултатите од неколку истражувања укажуваат дека болеста последниве децении прераснува во значаен јавноздравствен проблем на глобално ниво. До денес, за оваа болест нема јасна дефиниција, терминологија и класификација, а се уште не се знае многу ниту за нејзината зачестеност, етиопатогенеза, терапевтските опции, ниту пак за нејзиното влијание врз должината и квалитетот на животот на болните. Водичи за дијагностика на бронхиектазиите, како и за третман на болеста и нејзините егзацербации, нема или се во фаза на изготвување.
Ваквата состојба го натера проф. д-р Јордан Минов да напише монографија „Бронхиектазии кај возрасни„, која е прва од ваков вид во Македонија.
„Идеата за монографијата се јави во текот на учеството на тимот од Институтот за медицина на трудот на Р. Македонија – Колаборативен центар на СЗО во активностите на европската мрежа за епидемиолошки и клинички истражувања и едукација од обласна на бронхиектазиите и создавање Европски регистер за бронхиектазии воспоставени во 2012 година. Размената на податоци и искуства од овој домен со колегите од повеќе од 20 европски земји ја наметна потребата од подетално прикажување на сите аспекти на болеста и нејзино приближување до докторите и другите здравствени работници од сите нивоа на здравствената заштита кои секојдневно се сретнуваат со него. Доколку монографијата помогне во подобрување на квалитетот на грижата за пациентите со бронхиектазии, тоа ќе значи дека потполно ја постигнала целта„, изјави на денешната промоција професор д-р Минов.
Притоа, тој им се заблагодари на своите колеги од Катедрата по медицина на трудот на Медицинскиот факултет во Скопје и на сите останати соработници, нагласувајќи дека најголемата благодарност им ја должи на неговите пациенти без кои оваа книга немала да биде напишана.
(А.Ст)
