Проширени вени – симптоми, дијагноза, лекување

Хроничното воспаление на вените или флебитис може да предизвика сериозни компликации по здравјето. Може да дојде до појава на кожни рани и чиреви на потколеницата кои се последица од застојот на крвта во вената и намалување на исхраната на кожата.

Проширените вени се состојба која се јавува кај 25 % од женската и кај 10 % од машката популација и претставува проблем не само за пациентот, туку претставува сериозен здравствен и социјален проблем со оглед на последиците до кои може да доведе.

Симптоми кои се јавуваат при состојба на проширени вени се: чувство на напнатост, тежина, чешање по кожата, а некогаш и болка во нозете. На преглед се воочуваат видливи, зголемени вени над површината на кожата, благ оток околу глуждовите, со тек на време се јавуваат кафени пребојувања на кожата кај глуждовите, а кај потешките случаи се јавуваат кожни рани во пределот на потколениците.

Како се појавуваат проширените вени? Срцето претставува пумпа која ја турка крвта низ артериите до сите ткива во телото, а со крвта се пренесува кислород и хранливи материи до клетките. Аортата како најголема артерија се раздвојува на помали и помали крвни садови и на крајот мрежата на крвни садови во телото завршува со артериоли и капилари. Кога крвта се враќа, таа минува низ вените, од најмалите – венули, до најголемите (горна и долна шуплива вена ) за да се влее во срцето. Во нормалните вени постојат клапи кои како вентили се отвораат во правец на текот на крвта и не дозволуваат крвта да се враќа, напротив, потпомогнати од контракцијата на мускулите околу нив го одржуваат протокот во насока кон срцето. Кај проширените вени, овие клапи не ја вршат добро својата функција и дозволуваат крвта да заостане во вената и да предизвика проширување, кое најчесто се однесува на вените на нозете. Оваа состојба е почеста кај жените и е особено изразена при вродено ослабени венски клапи, но често се јавува и при бременост, воспаление на вените, долго стоење и зголемен притисок во стомачната празнина.

Дијагностицирањето на состојбата на проширени вени главно се базира на изгледот на вените при стоење или во седечка положба. По потреба може да се направи т.н. дуплекс ултрасонографија на екстремитетот за да се види крвотокот во вените, за да се исклучи друго заболување на нозете како што е венската тромбоза.


Терапијата за оваа состојба обично се сведува на совети. Пациентот треба да избегнува предолго стоење, да ги одмора нозете со нивно ставање во хоризонтална положба, а често треба да носи и еластични чорапи. Хируршка или некоја друга терапија се презема во случаи кога постои болка во ногата, обично изразена како тежина или замор, при појава на кожни рани предизвикани од голем застој на крв и недостиг на исхрана на ткивата, кога треба да се поправи надворешниот изглед, како и кога постои липодерматосклероза, односно доаѓа до постепено задебелување на масното ткиво под кожата како последица на високиот притисок во вените.
Венски стрипинг е хируршка операција и претставува вадење, поточно извлекување на проширената вена.

Хроничното воспаление на вените или флебитис може да предизвика сериозни компликации по здравјето. Може да дојде до појава на кожни рани и чиреви на потколеницата кои се последица од застојот на крвта во вената и намалување на исхраната на кожата. Исто така, при компликации доаѓа до прскање и поткожно крвавење од венскиот крвен сад, спонтано или при најмали повреди. Пациентот ова го забележува како честа појава на модринки.