Брусницата спаѓа во овошје – бобинки кое денес е се попопуларно и во исхраната и во медицината. Од листот и плодовите се прави чај, а од свежите бобинки сок и разни прехранбени производи.
Се разликуваат два вида на билката брусноца, европска брусница (Vaccinum vitis-idaea) и американска брусница (Vaccinum Macrocarpon – Cranberry). Разликите постојат во начинот на одгледување на билката и во надворешниот изглед на растението и плодот.
Брусницата има антибактериски, антисептичен, противвоспалителен и диуретски ефект.
Таа во мочниот меур спречува прикачување на ешерихија коли за епителните клетки на ѕидот на мочниот меур. Клиничките студии докажуваат дека сокот од брусница спречува прикачување на над 75% бактерии за ѕидот на меурот. Освен ешерихија коли, брусницата може да го намали прикачувањето и на други патогени кои често се наоѓаат во уринарниот тракт. Препораката е брусница, во било која форма да се зема заедно со антибиотска терапија и по завршување на терапијата. Поради присуството на флавоноиди во брусницата, таа има и антиоксидациско дејство, ги штити клетките од штетното влијание на слободните радикали и оксидациски оштетувања.
Новите студии поставуваат можност на делување на сокот од брусница и на дигестивниот тракт. Таа има ефект врз хеликобактер пилори, и како таква помага во лекувањето на чир на желудникот. Брусницата има дејство и на усната шуплина, каде го намалува ризикот од болести на забите и на непцата. Таа инхибира раст на бактериите во устата кои предизвикуваат забни наслаги. Се смета дека спречува бактериите да се задржуваат во забите.
Доколку се консумира како сок, препораката е да се пијат незасладени и високо концентрирани сокови од брусница. Може а се внесе во организмот и како свеж плод, во сушена форма, како додаток во исхраната, а својот позитивен ефект го постигнува преку одбрана на организмот од микроорганизми.
