Од Универзитетот Хонг Конг објаснуваат дека „се работи за прв показател на светот дека вирусот може да се пренесе од стаорец на човек и да предизвика инфекција“.
Досега немаше докази дека болеста може да се пренесе на тој начин, изјавиле авторите на студијата.
Хепатитис изолиран од стаорец „е многу далечен роднина на човечката варијанта на хепатитис Е“, додале од Универзитетот, истакнувајќи дека „се работи за големо откритие за јавното здравје“.
-
Болеста е дијагностицирана кај 56-годишен пациент со трансплантиран црн дроб, а тестовите покажале ненормална работа на тој орган.
Дневниот весник „South China Morning Post“ ја пренесува оценката на научниците дека пациентот можел да се зарази преку храна, која била контаминирана од измет од стаорец. Забележано е дека пациентот живеел во населба каде што имало зголемено присуство на стаорци.
Хепатитис Е вирус е една од најчестите причини за акутно воспаление на црниот дроб кај луѓето и погодува 20 милиони луѓе секоја година во светот, според податоците на Светската здравствена организација (СЗО). Се пренесува главно преку контаминирана вода.
Треска, жолтило, повраќање, нарушувања на функцијата на црниот дроб се некои од симптомите.
