Хормонските таблети со кои се спречува бременост на жените им се достапни повеќе од 60 години, додека на полиците на аптеките не постои ништо слично наменето за мажите. Меѓутоа ова би можело наскоро да се смени – тим на истражувачи објавил податок дека нивните пробни таблети за контрола на бременоста ги поминале тестовите на безбедност. Во испитувањето кое траело 28 дена никој од учесниците не покажал несакани дејства на лекот, а тоа е проблемот кој досега го уништи секој обид ваквите пилули да се пуштат во употреба.
Како функционира таблетата?
Научниците наведуваат дека за успешното тестирање благодарни му се на активното средство кое се наоѓа во составот на таблетите и кое е два хормони во еден. Станува збор за комбинацијата на прогестерон и модифициран тестостерон. Оваа хибридна молекула овозможува во телото секогаш да се одржуваат избалансирани нивоа на хормони.
„Со комбинацијата на прогестерон и тестостерон се одбегнуваат намалениот сексуален нагон и другите здравствени проблеми кои настануваат како послеица на изменетиот природен баланс на хормони“, објаснила докторката Кристина Ванг за Live Science. Таа работела на тестирање на таблетите на Универзитетот во Вашингтон, при Медицинската школа во Сиетл.
Кога хормоните се одделени, во телото идентични дози се ослободуваат со различна брзина. Прогестеронот спречува производство на сперма и го намалува природното ниво на тестостерон, а ако тестостеронот премногу се намали се зголемува веројатноста од создавање здравствени проблеми како крвни згрутчувања, депресија и сл.
Идејата е хормоните да се ослободуваат истовремено и, исто така, синхронизрано да се намалуваат.
„Со оглед на тоа дека таблетата која ја осмисливме го соединува прогестеронот со нешто што е приближно слично на тестостеронот, таквата молекула овозможува нивото на сперма да биде доволно ниско, а истовремето да постои доволно ниво на модифициран полов хормон кој ќе ги одржува останатите функции нормални“, истакнала д-р Ванг.
Од што се состоела постапката на тестирање?
Во период од 28 дена испитаниците биле поделени во три групи, а земале таблети од 200 и 400 мг активна состојка или добивале таблети со намена за плацебо ефект. Со тестирањето е утврдена само безбедноста на лекот, не и неговата делотворност – за лекот да делува потребно е да поминат меѓу 60 и 90 дена за да се намали производството на сперма. Ниеден од испитаниците на потврдил потенцијални несакани ефекти – зголемен притисок или депресија. Сепак, 22 учесници (од вкупно 30) пријавиле појава на акни, главоболки, намалување на сексуалниот нагон, блага еректилна дисфункција и замор, како и зголемување на телесната тежина меѓу 2 и 4 килограми, во зависност од дозата на лекот. Интересно е дека меѓу нив се нашле и три личности кои добивале лажна пилула.
Се уште е нејасно што би се случило ако пилулите се земаат подолг период. Моментално се прават тримесечни испитувања на глувци и мајмуни, а кога ќе се утврдат нивните резултати ќе се премине и на истражувања врз луѓе. Крајната цел е таблетата да се трансформира во инјекција, затоа што мажите не се расположени за секојдневно земање таблети.
Овие резултати беа објавени кон крајот на минатиот месец на годишната конференција на Здружението на ендокринолози, а студијата е објавена нешто порано, односно на 1 февруари во магазинот Journal of Clinical Endocrinology and Metabolism.
