Ако вашиот тинејџер запали цигара, седнете и поразговарајте со него. Имено, мошне е веројатно тоа да го сторил затоа што има пушачки ген – тврдат американските научници од Институтот за лекување болести на дишните патишта во Њујорк. А детето не е виновно за тоа и не смее да се третира како бунтовно.
После повеќегодишно истражување, стручњаците востановиле дека еден дел од испитаниците поседува генетски варијации кои се манифестираат на одредена возраст. Тие прв пат се изразуваат баш во адолесценцијата, кога повеќето и ја палат првата цигара. Дури 27 отсто од тинејџерите пушачи, се покажало за време на студијата, имале генетска варијација и тие во следните две децении станале страстни пушачи.
„Кај оние тинејџери кај кои е забележана таа наследна предиспозиција за пушење, регистрирано е дека побрзо станале никотински зависници и потешко се одвикнувале од цигарите отколку личностите без исти генетски склоности“, објаснува доктор Даниел Белски, водач на истражувачкиот тим, и додава: „Само пет отсто од испитаниците успеале да престанат да пушат, додека 22 отсто од нив, колку и да имале волја и да се труделе, не можеле да ги остават цигарите.“
