Анализа на податоци на 472.000 Британци на возраст од 40 до 69 години, покажала дека пушењето, дијабетесот и хипертензијата го зголемуваат ризикот од срцев удар или инфаркт на миокардот кај двата пола. Но, треба да се истакне дека растот на ризикот е поголем кај жените, во однос на мажите.
Така, пушењето кај мажите го зголемува ризикот од срцев удар за два пати, а кај жените за три пати. Што се однесува пак до високиот крвен притисок или хипертензијата, жените со овој здравствен проблем имаат 80% поголем ризик за појава на срцев удар, отколку мажите со истиот проблем.
Интересно е дека жените со дијабетес тип 1 имаат три пати поголем ризик од срцев удар отколку мажите со дијабетес тип 1. Жените пак со дијабатес тип 2 имаат 47% поголем ризик од срцев удар во споредба со мажите.
Прекумерната телесна тежина или дебелината, била поврзана со слично зголемување на ризикот од срцев удар кај жените и мажите.
Препораката на стручњаците е ризик факторите за срцев удар, како високиот крвен притисок, пушењето и дијабетесот да бидат ставени под контрола, а што е можно побрзо, дури и пред менопаузата.
