Возрасните пушачи имаат за 60 отсто поголем ризик од губење на слухот, покажало едно ново истражување. Добра вест е дека тој ризик драстично се намалува кога ќе престанете со пушење. Врската меѓу пушењето и губитокот на слухот е пронајдена уште пред неколку години, но се ’заташкувала’ заради недоволно доказен материјал. Сега истражувачите анализирале медицински наоди на волонтери, кои вклучувале тест на слухот и прашалник за стилот на живот.
Немало дилема, заклучено е дека ризикот од губење на слухот значително е поголем кај активните пушачи отколку кај луѓето кои никогаш не запалиле цигара. Попрецизно, пушењето го зголемува ризикот од губење на слухот за 20 до 60 отсто. Влијанието на пушењето било присутно дури и откако било земено предвид нивото на изложеност на бука.
„Имаме цврст доказ дека пушењето е сосема независен причинител на ризик од наглувоста и глувоста“, тврди авторот на студијата Хуанхуан Ху.
Цигарите влијаат на способноста за препознавање на звуците, како високите така и ниските фреквенции, со тоа дека штетата од првите е поголема, пишува Дејли меил. Тоа е уште една причина повеќе да се ослободите од оваа навика и да станете непушач.
