Пушењето цигари го достигнува најниското ниво во својата историја, но пушењето наргиле е се попопуларно меѓу младите. Истражувачите се загрижени дека постои можност од нова епидемија, пренесува Health24. Иако во минатото се сметало за егзотична разонода и културен феномен на Блискиот Исток, пушењето наргиле во последните неколку години се проширило и во Европа и Сверна Америка.
„Кога го започнав ова истражување, пред 20-тина години, не ни помислував дека ова ќе стане глобален проблем. Од Блискиот исток наргилето се пресели во САД, и тоа е една нова атракција меѓу младите Американци„, вели д-р Васим Мазиак, професор и водител во Одделението за епидемиологија на Меѓународниот универзитет Флорида, Мајами.
Според проценките на Центарот за контрола и превенција на болести, блиску 2,6 милиони возрасни во САД или 1% од вкупното население интензивно пушеле наргиле во 2017 година, речиси двојно повеќе во однос на изминатите неколку години.
Наргиле најчесто пушат млади луѓе на возраст од 18 до 24 години, но и помлади лица.
За разлика од тутунот во цигарите, тутунот за наргиле може да има различни вкусови, што им се допаѓа на младите потрошувачи. Тој тутун исто така произведува ароматичен дим кој е полесен и попријатен за вдишување, за разлика од тутунот од цигарите.
Иако се уште се спроведуваат истражувања за влијанието од пушењето наргиле на здравјето, прелиминарните наоди покажуваат дека тоа сигурно не е безопасно.
„Пушење наргиле најверојатно е опасно колку и пушење цигари. Кога станува збор за одредени канцерогени супстанци и токсини, наргилето е многу поопасно од цигарите„, рекол Мазиак.
Преку пушењето наргиле, во организмот се внесува поголема количина дим, катран и никотин, во однос на цигарите, покажало истражување од 2016 година. Во просек пушењето наргиле трае околу 30 минути до еден час, за разлика од петминутното пушење цигара, со што се продолжува изложувањето на токсини и штетни хемикалии, вели Мазеик.
