Денес во професионалниот свет е важно да се биде достапен, па дури и по работното време. Во некои професии не постои работно време, тврдат работодавачите, но таквиот став може сериозно да им наштети на вработените, покажале германските истражувачи. Од 57.000 испитаници, дури половина работеле и кога ќе дојдат дома, а тоа негативно влијаело на нивното здравје.
Истражувачите од Друштвото за работни, индустриски, организациски и психолошки истражувања, утврдиле дека лицата кои работат навечер во своето приватно време, како и преку викендот, во поголема мерка се жалат на несоница, главоболка, замор, анксиозност, проблеми со мускулите, крвниот систем и желудникот.
“Нашето истражување сугерира дека дури и најмала дополнителна работа по договореното работно време може да доведе до здравствени проблеми. Поврзаноста е голема“, вели д-р Ана Арлингхаус, водач на студијата.
Нејзиниот тим повикува на морално однесување на работодавците, за да престанат да го нарушуваат приватното време на своите вработени.
“Технолошките напредувања направија секогаш да се биде достапен, а тоа врши голем притисок на луѓето. Слободно време без никаква работа е клучно за телото да може да се опорави“, предупредуваат германските стручњаци.
