„Не знаев дека сум неплодна. Редовно користев контрацепција затоа што не сакав да забременам. Кога решив дека сакам да добијам дете – се случи ништо!“… само еден од примерите на жените кои се соочуваат со неплодност.
Во целиот процес на борба за потомство идните мајки се соочуваат со низа проблеми за кои ретко се зборува гласно. Чувството за осаменост со кое се соочуваат, разочарувањето кое го носи секоја менструација, тагата која им ја предизвикува погледот на некоја трудница… Една жена, сега мајка, никогаш не заборавила со што се се соочила во битката за потомство, па решила да го сподели своето искуство.
„Иако знам дека секоја жена во слична ситуација различно ќе се носи со проблемот, го запишав сето она што сакав да се знае. Можеби некому ќе помогнат овие совети“, напишала во својата исповед.
Неплодноста не е резервирана за „старите прворотки“ од 37 и повеќе години…
…. па дури ни за жените кои имаат некој здравствен проблем кој може да се дијагностицира. Јас имав 30, а мојот сопруг две повеќе. Моите јајца беа во совршен ред, неговата сперма одлична. Немаше никаква медицинска причина зошто не можам да зачнам, а повторно на крајот сепак успеав со помош на вештачко оплодување. Секој пар е различен и ниту едно женско тело не е исто.
Времето го доживуваш како непријател
Кога месец по месец се соочуваш со болниот факт дека не си забременила, ти се чини дека со секој месец изгледите се се помали, дека времето работи против тебе и дека никогаш нема да забремениш.
Тешко е да се биде покрај туѓи деца
Всушност тешко е да се биде покрај родителите. Тешко е да се гледа како некој турка детска количка, тешко е да се гледа бремена жена. Потполно разбирливо.
Потпомогнатото оплодување е скапо
Цената на постапката, зависно од тоа дали е потребна само инсеминација со семето на партнерот или посложен зафат како што е вонтелесното оплодување, е висока, а трошокот расте во зависност од тоа колку пати постапката треба да се повтори.
Неплодноста те окупира
Додека чекаш да видиш дали успеало и кога животот ти се одвива меѓу одењата на лекар, вадењата крв и ултразвучните прегледи тешко е да се мисли на што било друго.
Хормонската терапија не е шега
Лекувањето на неплодноста и потпомогнатото оплодување значи дека ве „пумпаат“ со хормони. А тоа влијае и на емоциите и на телото. Можеш да добиеш мозолчиња на лицето, неколку дополнителни килограми, ќе плачеш без причина или ќе се нервираш за секоја ситница. Но сети се, тоа ќе помине еднаш!
Во очај ќе пробаш се
Жените кои се борат со неплодноста се склони да преземат, ама баш се за да забременат и ќе се согласат на секоја метода, колку и да е бизарна таа. Сепак, бидете внимателни и не согласувајте на се што ветува чудесни резултати.
Социјалните мрежи се пекол
Додека се обидувате да забремените, пријателите на Фејсбук и Инстаграм постојано споделуваат фотографии од своите бебиња, дечиња… И тоа секојдневно ве потсетува на она што вие го немате. Најпаметно е некое време да престанете да ги посетувате вашите профили.
