За цревата и столицата никој не сака да зборува, разбирливо, ни би требало да го „слушате“ и тој дел од своето тело затоа што токму тоа би можело да го спаси животот. Ракот на цревата, познат и како колоректален канцер, прилично е чест облик на рак и најчесто ги погодува луѓето постари од 50 години иако тоа не е правило и може да заболи кој било. Она што е важно е дека повеќето луѓе на кои им е дијагностициран рак на цревата искусиле некои од овие симптоми, но ги занемариле.
Симптоми на кои треба да посветите внимание:
- Крвавење од аналниот отвор, крв во столицата;
- Промена во вообичаените навики за одење во тоалет, ако на пример, одите во тоалет почесто од вообичаено;
- Болка или јазолче на стомакот;
- Екстремен умор;
- Нагло и слабеење без објаснување.
Туморот во цревата најчесто крвави, заради што може да дојде до намалување на црвените крвни зрнца, односно анемија. Тоа може да резултира со умор и тешкотии во дишењето. Во некои случаи ракот може да ги блокира цревата и да доведе до опструкција. Уште некои од симптомите кои укажуваат на рак на цревата се болка во абдоменот, чувство на надуеност, констипација или неможност да се пушти гас, мачнина… Иако не треба да се занемари ниту еден од овие симптоми, експертите предупредуваат дека најсериозен сигнал е крвта во столицата. Истакнуваат дека и на лекарите понекогаш им е тешко да ја дијагностицираат оваа болест затоа што во многу случаи овие симптоми може да се знак за некоја помалку опасна болест.
Фактори на ризик за рак на црева
Точната причина за повеќето облици на рак на црева не е позната, но познато е дека некои фактори на ризик го зголемуваат ризикот од заболување. Личностите постари од 50 години се изложени на поголем ризик од заболување од рак на црева, но тоа не значи дека младите не можат да заболат. Освен тоа ризикот е поголем ако во семјството имате историја на болеста. Исто така, еден од факторите на ризик е ако во семејството имате историја на канцерогени израстоци, како на пример, полипи во цревата. Долготрајните воспалителни болести на цревата како Кронова болест или улцерозен колитис, дијабетес тип 2 го зголемуваат ризикот од рак на црева, како и нездравите животни навики – пушење, дебелина, недостаток на физичка активност.
Има ли лек за ракот на црева?
Ракот на црева може да се лекува и излекува, особено доколку се открие навреме. Девет од десет заболени кај кои ракот се открива во прва фаза можат да живеат подолго од пет години по дијагностицирањето. Меѓутоа шансите за лекување опаѓаат колку подоцна се открие затоа не ги занемарувајте симптомите кои би можеле да ви го спасат животот!
