Карциномот на усната шуплина (од епително потекло) чини 5% од малигните тумори на сите регии на телото и е еден од 10. најчести тумори воопшто. Најчесто место на појавување во орофаринксот се крајниците и базата на јазикот. Во усната шуплина најчест е на дното на усната шуплина, на страничните рабови на јазикот и на предната страна на лаковите на непцата.
СИМПТОМИ
Можно е да не ги забележите, но најчести симптоми се ранички од внатрешната страна на образите или на усните кои тешко или никако не поминуваат. Може да се почувствува и топче или да се забележи црвенило или бела дамка на ткивото во внатрешноста на усната шуплина. Други знаци се чувство на трнење во устата, болка, крварење без видлива причина или општа слабост. Исто така, може да се забележи промена на бојата на гласот, ѕвонење во ушите или појава на воспаление на грлото кое не минува. Можно е и, без јасна причина, да почнат да се клатат забите.
Ова може да бидат и симптоми на некоја друга, помалку сериозна состојба. Поразговарајте со својот лекар за промените кои ви се случуваат во усната шуплина, за да ви помогне да ја откриете вистинската причина.
КОЈ Е ВО РИЗИЧНА ГРУПА?
- Лицата постари од 45 години се под поголем ризик од заболување, но ракот на усната шуплина е присутен кај сите возрасни групи. Речиси 90% од заболени од карциноми во пределот на главата или вратот се пушачи или лица кои континуирано биле изложени на секундарно пушење.
- Консумирањето алкохол го зголемува ризикот, особено кај лицата кои секојдневно консумираат повеќе од еден алкохолен пијалок.
