Менопаузата во просек се јавува по 50-та година, додека предвремена, рана менопауза се опишува како состојба која се појавува пред 40-та година. Симптомите кај жените се индивидуални и разновидни.
Хормонски профил
Подолг период на отсуство на циклус е првиот знак по кој секоја жена ќе се консултира со својот гинеколог. Ако се исклучат сите други можни причини за отсуство на менструацијата, проследено со лабораториски тестови во кои се истражува хормонскиот профил (хипофиза, јајници, тироидна жлезда, надбубрежни жлезди) доколку е фокусот ставен на зголемување на хормоните на хипофизата (FSH и LH) и ниското ниво на естроген, како и евентуално ниско ниво на AMH хормон, дијагнозата е јасна.
Знаците на предвремена менопауза се исти како оние на менопауза, но кај некои жени може да бидат поблаги, а кај некои посериозно изразени. Експертите велат дека, генерално, раната менопауза може да се препознае по нередовните циклуси, скратеното времетраење на периодот или негово изостанување, неправилно крвавење, бранови на топлина, ладно препотување… – сето тоа се знаци дека јајниците произведуваат помалку естроген.
Вагинална сувост
Покрај овие симптоми, некои жени може да искусат и вагинална сувост, чувствителност и иритација при сексуални односи, може да имаат проблеми со мокрењето и инконтиненција, а може да се појават и физички промени во телото, како што се сува и нееластична кожа, повеќе брчки и послаба коса.
Прераната менопауза зафаќа шест отсто од жените. Најчесто причината е во недоволно истражените генетски или автоимуни нарушувања. Разбирливи се и останатите причини: хемотерапија и радиотерапија по малигна болест, рана хистеректомија која ја нарушува локалната циркулација и го намалува дотокот на крв до јајниците (последица е токму раната менопауза), токсини од чад од тутун и фталат (состојка на пластика и вештачки материјали), како и интензивната и честа стимулација на овулацијата, во рамките на медицинско потпомогнато оплодување.
Естроген
Ниското ниво на естроген влијае врз здравјето на жените, бидејќи остануваат без својата природна заштита од болести, па може да се зголеми ризикот од некои заболувања. Раната менопауза не може да се запре или да се промени, но со лекување се ублажуваат непријатните симптоми.
Несоница и депресија
Жените може да страдаат од несоница, промени во расположението, па дури и депресија, намалена желба за секс, болки во зглобовите и мускулите, а поради зголемување на апетитот може да дојде и до зголемување на телесната тежина.
Цигари
Постојат многу причини зошто пушењето е штетно за здравјето, но се покажа и дека има големо влијание врз појавата на предвремен климактериум затоа што никотинот го намалува производството на естроген. Кај пушачите, знаците на предвремена менопауза може да се појават до девет години порано од просекот, покажуваат британските студии.
