Специјален начин на исхрана кој вклучува и гладување и внес главно на намирници од билно потекло, може да помогне во регенерација на панкреасот, тврдат научниците.
Благодарение на него, може да се обноват клетките кои произведуваат инсулин и со тоа да се спречи напредувањето на дијабетес тип 1 и 2, пишуваат научниците во списанието “Cell”.
Научниците испитувањата ги вршеле на глувци и утврдиле дека панкреасот кај овие глодари сам се регенерира, доколку се стават на посебен режим на исхрана 4 дена во неделата.
Кај дијабетесот тип 2 панкреасот не произведува доволно инсулин, хормон клучен за претворање на шеќерот во енергија, а инсулинот што го произведува не функционира како што треба. Некои заболени на почеток може да ги контролираат симптомите со вежбање и правилна исхрана, но повеќето од нив на крајот се приморани да земаат лекови и инјекции инсулин.
„Со активирање на обновувањето на клетките во панкреасот успеавме да ги спасите глувците кои боледуваа од дијабетес тип 1 и 2 во поодминат стадиум„, објаснува д-р Валтер Лонго, геронтолог и директор на Институтот за долговечност при Универзитетот во Јужна Калифорнија.
„Успеавме повторно да активираме и производство на инсулин во клетките во панкреасот кај луѓето кои боледувале од дијабетес тип 1„, додава тој.
Режимот на исхрана кој научниците го примениле е сиромашен со калории, шеќери, протеини, но е богат со незаситени масти. Овој режим е најсличен на веганската исхрана и се состои од супи од зеленчук, енергетски плочки, чаеви, витамински суплименти.
Вкупен дневен внес на калории се движи од 770 до 1.100 во однос на вообичаената дневна консумација од 2.500 калории за мажи и 2.000 за жени. Поранешни истражувања покажале дека постот може да го намали ризикот од кардиоваскуларни болести и да го зголеми ефектот на хемотерапијата.
