Речиси половина од смртните случаи на рак во светот се поврзани со фактори кои можат да се избегнат како пушење, консумирање алкохол, секс без заштита и прекумерна телесна тежина, посочуваат научниците.
Тие анализирале податоци од околу 10 милиони луѓе кои во 2019 година починале од 23 видови на рак.
Надворешни фактори биле причина за болеста кај 4,45 милиони смртни случаи, односно 44,4 проценти од нив.
“Оваа студија покажува дека товарот од ракот останува важен јавно-здравствен предизвик чија магнитуда расте во светот“, вели проф. д-р Кристофер Мури од Универзитетот Вашингтон, коавтор на студијата.
Најчести причини за рак се пушењето (околу 36 проценти од случаите), консумирањето алкохол (околу 7 проценти), сексуално преносливите болести (6,5 проценти) и прекумерната телесна тежина (околу 4,2 проценти кај мажите и 5,2 проценти кај жените).
Во 2018 година, повеќе од 2 милиони случаи на рак се поврзани со инфекции како што се Helicobacter pylori, хепатитис и ХПВ.
Студијата покажала и дека ризикот од смрт од рак поради надворешни фактори е поголем кај мажите (во 50,6 проценти од случаите) отколку кај жените (36,3 проценти).
„Главната порака на ова истражување е јасна: значителен број на карциноми, најверојатно повеќето од нив кога станува збор за инфекции, може да се спречат“, пишуваат научниците во стручното списание Lancet.
Во написот се нагласува дека превенцијата од рак има и финансиски ефект: инвестирањето до 100 милиони долари во превенција резултира со заштеда од 100 милијарди долари во трошоците за лекување.
