![tek-nek (4)](https://panacea.mk/wp-content/uploads/2018/09/tek-nek-4-696x392.jpg)
Да,за се се виновни паметните телефони и таблетите – не само што влијаат врз структурата на ‘рбетот, туку и го стимулираат создавањето на брчки на лицето и вратот.
Дали некогаш сте почувствувале болки во вратот или грбот за време на предолгото гледање во лаптопот, таблетот или паметниот телефон? Ако е така, вие сте дел од новиот глобален здравствен проблем.
-
Имено, со се поголемата употреба на модерната технологија на преносни уреди, кои, мора да признаеме ни го прават животот полесен, доаѓа и до појава на „електронска епидемија на болка“, која е толку честа што здравствените експерти имаат и медицински термин – „Tech neck“ (технолошки врат).
Во слободен превод значи здравствени проблеми и хронична болка во вратот предизвикани од подгрбавеното држење и наведната глава додека предолго и пречесто зјапаме во своите паметни телефони, таблети, лаптопи итн.
![](https://panacea.mk/wp-content/uploads/2018/09/tek-nek-2-750x500.jpg)
Влијание врз здравјето
Се поголемата опседнатост со технологијата влијае врз нашето здравје, а експертите предупредуваат дека ова е само почеток на проблемите и дека за неколку години ќе ги откриеме вистинската далекусежни последици.
Неодамнешното истражување на американскиот Универзитет Бејлор покажало дека нашата технолошка зависност е поголема отколку што воопшто може и да замислиме. Резултатите говорат дека младите луѓе во просек минуваат меѓу осум и десет часа дневно на своите телефони, и целото тоа време телото им е подгрбавено и во неприродна положба.
Голем дел од денот поминуваме со главата наведната нанапред, а тоа значи дека полека го навикнуваме телото на неприродна позиција, ‘рбетот се деформира и старееме многу порано отколку што треба, предупредуваат експертите
Последици
Последиците се болки во вратот, главоболка, напнатост во рамената, трнење, па дури и проблеми со забите и вилицата. Сите овие проблеми се директно поврзани со неправилното и неприродно држење поради предолгата употреба на сите облици на современата преносна технологија, а бројот на луѓе со овој проблем, и тоа не само кај адолесцентите, туку и кај возрасните, се зголемува драматично. Експертите предупредуваат дека во следните десет години тој број уште ќе расте, а ситуацијата воопшто не е безопасна, бидејќи долгорочно, освен здравствени, носи и емоционална потешкотии, особено кај младите луѓе.
Постојаното наведнување на главата за да видите што пишува на паметниот телефон или таблет не само што влијае на структурата на ‘рбетот, туку, исто така, може да поттикне и развој на брчки на лицето и вратот.