Вашиот кревет е можеби последното место за кое мислите дека е валкано. Сепак, тоа е вашето засолниште во ноќта, кое се обидувате да го направите што е можно поудобно и почисто. Редовно ја перете и менувате постелнината, се туширате пред спиење и носите пижами? Научниците тврдат дека ништо од ова не помага. Вашиот кревет е многу повалкан отколку што мислите, пишува „Shape“.
Новото истражување на Универзитетот во Северна Каролина покажало дека човечкиот кревет е повалкан и од засолништето на шимпанзата. Тврдат дека креветот не е валкан поради надворешните влијанија, туку поради самите луѓе
„Знаеме дека домовите на луѓето се сопствени екосистеми и дека креветите често содржат разни организми. Околу 35 проценти од бактериите во човечкиот кревет доаѓаат од човечкото тело, вклучувајќи ги и фекалните, оралните и кожните бактерии“, изјавила Меган Томс, водечки истражувач.
Со оглед на тоа што шимпанзата живеат во својата природна средина во шумата, нивното засолниште не содржи толку бактерии. Како што луѓето го поминуваат поголемиот дел од своето време надвор и ја носат сета таа нечистотија во куќата, домот и креветот се подложно тло за развој на бактерии.
Научниците додаваат дека тука нема помош, освен ако планирате да ја перете постелнината секоја вечер (што баш и не е практично). Добрата вест е дека нашето тело се навикнало на оваа состојба, па не мора да се плашиме од какви било негативни последици, тврдат истражувачите од Северна Каролина и однапред се извинуваат за „непријатните“ заклучоци.
