Ако сте љубител на миризливи освежувачки плодови од природата, со малку киселкаст вкус, тогаш, рибизлите се вистинскиот избор за вас.
Освен што содржат големи количини на хранливи материи, рибизлите се идеални како додаток на смути, сосови, џемови и разни слатки и солени јадења. Во продолжение, неколку интересни факти за рибизлите…
- Зрела грмушка рибизла може да даде до 4 кг овошје;
- Рибизлите главно се произведуваат во Европа и Азија;
- Освен црвени, постојат и бели и црни рибизли;
- 100 г црвени рибизли имаат 56 калории;
- Рибизлите не содржат масти ниту холестерол.
Здравствени придобивки од рибизлите
Низок гликемиски индекс
Гликемискиот индекс ги групира намирниците според тоа колку влијаат врз зголемувањето на шеќерот во крвта. Намирници со висок гликемиски индекс, како бел ориз и бел леб, лесно ќе се разградат и ќе го подигнат нивото на шеќер и инсулин во крвта, по што следува ненадеен пад. Шеќерот од рибизлите се апсорбира полека во крвотокот, со што се спречува ненадеен пад на шеќерот и промени во расположението.
Борба против инфекции
Една шолја рибизли содржи 77% од дневните потреби за витамин Ц. Витаминот Ц е моќен природен антиоксидант растворлив во вода, кој му помага на организмот да го зајакне имунолошкиот систем.
Нега на коса и кожа
Адекватен внес на витамин Ц го подобрува имунолошкиот систем и го стимулира производството на колаген, што е исклучително важно за здравјето и убавината на косата и кожата.
Создавање на црвени крвни клетки
Рибизлите содржат бакар и железо, кои се од суштинско значење за формирање на нови крвни клетки. Недостатокот на железо може да доведе до анемија, замор и мускулна слабост.
Зајакнување на коските
Рибизлите се богат извор на витамин К, кој го задржува калциумот во коските. Една шолја рибизли содржи 15% од дневните потреби за овој витамин.
Здравје на дигестивниот систем
Препорачаната дневна доза на диететски влакна за мажи изнесува 38 г и 25 г за жени. Рибизлите содржат влакна, кои го спречуваат запекот. Влакната, исто така, може да го „исчистат“ холестеролот од крвните садови, пишува „Dovemed“.
