Ангина пекторис е синдром (збир на симптоми предизвикани од здравствената состојба), кој се јавува кога дотокот на крв богата со кислород до срцето е ограничен. Најчест симптом е болка во градите, која обично се активира со физичка активност.
Најголем број случаи на ангина пекторис се предизвикани од атеросклероза (болест кај која крвните садови стануваат тврди и се стеснуваат, па го ограничуваат протокот на крвта).
Ризик факторите за атеросклероза вклучуваат:
- возраст
- пушење
- дебелина
- мрсна храна
ТИПОВИ НА АНГИНА ПЕКТОРИС
Постојат два основни видови на ангина:
- Стабилна
- Нестабилна
СТАБИЛНА АНГИНА
Во случај на стабилна ангина, симптомите се јавуваат постепено, со текот на годините и обично следат постојан шаблон. На пример, симптомите се јавуваат само кога се качувате по скали, или ако сте под стрес. Симптомите обично траат неколку минути. Стабилната ангина сама по себе не е опасна по живот, но е сериозно предупредување дека имате зголемен ризик од инфаркт. Поради ова, со лекување на симптомите на ангина, го намалувате ризикот од сериозни последици, добивате и дополнителна терапија, а во некои случаи и операција.
НЕСТАБИЛНА АНГИНА
Во случај на нестабилна ангина симптомите се развиваат брзо, може да се јават и кога одморате и траат и до половина час. Симптомите на нестабилна ангина може да се појават доколку претходно сте имале форма на стабилна ангина, но се јавуваат и кај луѓе кои немале. Нестабилната ангина треба да се третира како итен случај, бидејќи е знак дека функционирањето на срцето значително се влошува, што го зголемува ризикот од инфаркт или удар. Нестабилна ангина се лекува со лекови или операција.
Перспектива
Перспективата кај стабилната ангина изгледа прилично добро. Според некои проценки, едно од 100 заболени лица ќе доживее фатален инфаркт или удар, а околу 0,5-2,6% заболени доживуваат нефатален инфаркт. Ризикот од потенцијален фатален инфаркт може значајно да се намали со неколку едноставни промени во начинот на живот. На пример ако сте пушач и имате проблеми со телесната тежина, со престанување на пушењето и намалување на килограмите во границите на нормала, ќе го намалите ризикот од фатален инфаркт за 400%.
Перспективата на лицата кои страдаат од нестабилна ангина може значајно да варира, во зависност од бројни ризик фактори. Некои од нив се:
- години
- претходни случаи на срцеви заболувања
- висок крвен притисок (хипертензија)
- хронични заболувања, како дијабетес
Во зависност од овие фактори, ризикот дека заболениот ќе доживее инфаркт во првите 14 дена по појавата на симптомите, се движи од 2 до 16 отсто.
