Научниците од американското Министерство за воени ветерани ги споредиле стапките на нови кардиоваскуларни проблеми кај 153.760 лица заразени со коронавирус пред вакцините да бидат достапни со стапките кај 5,6 милиони лица кои не се заразиле со вирусот и уште 5,9 милиони лица чии податоци се собрани пред пандемијата.
Во просек, една година по опоравувањето од акутната фаза на инфекцијата, оние кои преживеале од КОВИД-19 имале за 63% поголем ризик за срцев удар, 69% поголем ризик за проблематичен неправилен ритам на срцето, 52% поголем ризик од мозочен удар, 72% поголем ризик од затајување и речиси три пати поголем ризик од потенцијално смртоносно крвно згрутчување во белите дробови во споредба со останатите две групи, пишува во извештајот објавен во списанието Nature Medicine.
НИКОЈ НЕ Е ПОШТЕДЕН
Зголемени ризици меѓу лицата кои се опоравиле од КОВИД-19 биле евидентирани кај млади и повозрасни, мажи и жени, лица со и без дијабетес и со и без болести на бубрезите, како и кај пушачи и непушачи, вели Зијад Ал-Али од Универзитетот Вашингтон.
Ризиците биле високи дури и кај лицата кои имале благ КОВИД-19 и не морале да бидат хоспитализирани поради тоа, вели тој ии додава “вирусот навистина не поштеди никого“.
Лицата заболени од КОВИД-19 треба да обрнат внимание на своето здравје и да побараат лекарска помош доколку почувствуваат симптоми како што се болка во градите, притисок во градите, срцебиење, отоци во нозете итн.
