Лекарите предупредуваат дека училишните торби можат да предизвикаат проблеми со вратот, рамената и грбот кај децата доколку се несоодветни, претешки или неправилно се носат. Родителите би требало одвреме – навреме да ги прегледуваат ранците на своите деца, бидејќи често се случува во нив да носат одвишни работи, без оглед дали станува збор за книги, тетратки, прибор или играчки. Доколку сите предмети во торбата се неопходни, тогаш можеби најдобро е таа да е на тркалца. Размислете, ваквите торби се добра алтернатива.
Училишниот ранец не би требало да биде потежок од 10 проценти од телесната тежина на детето, ниту да биде поширок или подолг од трупот на детето. Исто така, не треба да виси повеќе од 10 см под половината, затоа што во тој случај детето најчесто додека оди се навалува кон напред.
Прерамките треба да бидат широки, поставени и да се подесуваат, и детето секогаш треба да го носи ранецот на двете раменици, никако само на едното рамо. Одбирајте ранци или торби кои имаат повеќе прегради за книгите и останатите предмети да можат соодветно да се распоредат, и посочете му на детето тешките предмети и оние со остри рабови да не ги става во задниот дел кој допира на грбот.
Исто така, посветете внимание на евентуалните проблеми – дали на детето му остануваат црвени траги од носењето на ранецот, дали се жали на болки или дали дури доаѓа до промени во држењето на телото. Овие проблеми сфатете ги сериозно и брзо реагирајте, а ако тие се присутни и после промена на ранецот, консултирајте се со педијатар со цел изнаоѓање најдобро можно решение.
