Училишната година почна, градинките по летниот распуст повторно се преполни со деца. Појавата на вошки во овие установи не е ништо ново и е вообичаена појава. Доколку детето фати вошки, велат лекарите, не е ништо страшно бидејќи не станува збор за болест, ниту, пак, за срам како што се уште сметаат поголем дел од родителите. Се што треба да се направи е да се реагира на време паразитите што побрзо да се отстранат од главата на детето и да се информира околината и средината каде престојува за навреме да се преземат сите превентивни мерки.
Вошките се мали инсекти кои живеат во косата на луѓето. Тие се хранат со мали количества крв исцицана од скалпот и положуваат јајца – наречени гниди. Појавата на гниди е сигурен индикатор за присуство на вошки. Наезда од вошки уште се нарекува и педикулоза.
Симптоми
Најчестиот симптом за присуство на вошки е чешањето, особено на задниот дел од главата и вратот, близу ушите – области каде вошките најчесто живеат. Интензивно чешање може да ја оштети кожата на скалпот и да доведе до рани и инфекции.
Понекогаш може да помине период од две до три недели по наездата од вошки за да почне чешањето.
Пренесување
Вошките не скокаат, ниту, пак, летаат, едноставно се шират преку директен контакт на глава со глава, а многу поретко преку користење на исти предмети со лице кое има вошки (чешел, шал, капа, крпа, шноли и стегачи, облека, ќебиња, перници).
Честота
Вошките се честа појава. Се јавуваат кај 6 до 12 милиони луѓе годишно, но најзасегнати се децата кои одат на училиште. Кај нив блискиот контакт и споделувањето на лични предмети е многу почесто. Вошките многу почесто ги напаѓаат девојчињата отколку машките, но не се поштедени и возрасните.
Третман
Ако гледате одблиску, може да ги видите малечките гниди закачени на влакната. Гнидите се слични на првутот, но не се така лесни за отстранување со четка или миење. Возрасните вошки се движат брзо и поради тоа тешко се забележуваат. Најлесно ќе ги уништите со специјалните медицински шампони и исплакнувачи за коса кои содржат супстанција наречена пиретрин и се достапни без рецепт. Користењето на густ чешел помага во ослободувањето на гнидите од косата. По секој третман со шампонот против вошки важно е убаво да се измијат сите чешли, капи и крпи. Овие шампони се многу ефикасни и убиваат речиси 100 % од вошките и 99 % од гнидите. Но, поради можноста некоја гнида сепак да остане жива неопходно е упорно и систематски да се отстранат од косата.
Секој ден прегледувајте го детето, и ако густиот чешел не ги отстранил до крај, направете го тоа рачно и повторно измијте ја косата со специјалниот шампон.
Превенција
Најдобрата превенција е да му кажете на детето да не ги споделува своите лични предмети, како што се чешлите, крпите или капите со други деца, како и да се избегнува контакт со лица кои имаат вошки. Исто така, известете ги во училиштето или во градинката доколку вашето дете има вошки и одредено време не го пуштајте на настава, додека не се справите со проблемот. Постојат и специјални спрејови кои превентивно се прскаат на детската коса.
