Романскиот неврохирург Влад Циуреа тврди дека постои начин како мозокот правилно да се одмори, односно дека постои начин како да се стимулира и опушти овој човеков орган, кој и тоа како може да се замори.
„Мозокот не е орган што можеме да го контролираме. Можеби не знаете, но и нему му треба одмор и внимание“, вели Циуреа и додава: „Мозокот никогаш не спие, но постои начин да го одморите и стимулирате.“
Неврохирургот препорачува одење во кревет без мобилен телефон во близина. Потоа наутро прво да се погледне во небото или едноставно да се ужива во погледот низ прозорецот за на тој начин да се стимулираат визуелните центри. Препорака е и да се слуша музика што го поткрева расположението. Кога станува збор за исхраната и внесувањето течности, Циуреа вели, дека е пожелно веднаш по будењето да се испие чаша вода, а да се јаде умерено, бидејќи желудникот го преоптоварува мозокот. Според него, добро е и да се консумира црно вино бидејќи тоа помага при чистењето на капиларните вени во мозокот, но, секако, без претерување бидејќи алкохолот ги напаѓа нервните клетки. Исто така треба да се огранични гледањето телевизија.
А златното правило за одморен мозок на Циуреа е тишината! Циуреу советува да одвоите време за уживање во тишина, за да си ги средите мислите.
