Салмонелата е бактерија која го напаѓа цревниот систем и предизвикува труење со храна. До ова најчесто доаѓа со консумирање на недоволно варено или сурово месо од живина и со јадење јајца, како и производи направени од нив.
Симптомите се главоболка, треска, грчеви во стомакот, пролив, гадење и повраќање. Обично се јавуваат од 6 до 72 часа после заразувањето и траат од 4 до 7 дена, понекогаш и многу подолго. За оваа болест нема лек – таа поминува сама од себе.
Понекогаш, лицето може да дехидрира, па е потребна брза медицинска интервенција, а до компликации, кои се опасни по живот, може да дојде ако инфекцијата се прошири надвор од цревата.
Ризикот од зараза со салмонела се зголемува ако лицето престојува на места каде што има лош санитарен систем.
Симптоми на салмонела
- Болка во стомакот;
- Треска;
- Главоболка;
- Крв во столицата;
- Повраќање и гадење;
- Дијареја;
- Висока температура;
- Мускулна болка.
Симптомите може да траат и до седум дена, а може да продолжат и до неколку месеци се додека здравствената состојба не се врати во нормала.
Салмонелата се уништува со комплетно готвење на храната. Избегнувајте живо или недоволно зготвено месо, месо од живина или јајца. Месото од живина и другото месо не треба да се јаде ако во средината е розево
Причини
До зараза доаѓа со консумирање на храна која е загадена, а најчесто се работи за заразено овошје и зеленчук, морски плодови, сурово месо, живина и сурови јајца.
Заразата може да се пренесе на храната и со посредство на човекот и тоа преку валкани раце. До зараза доаѓа кога храната ќе дојде во контакт со раце кои не се измиени после менување пелени или користење на тоалет. Инфекцијата може да се случи и ако лицето допира заразено место, како и влекачи, домашни миленичиња, но особено птици, а потоа неизмиените раце ги стави во устата.
Луѓето кои се враќаат на работа по ракување со заразена храна, продолжуваат да ја шират заразата, а некои луѓе заразени со салмонела стануваат хронични преносители. Некои луѓе може да не бидат заразени, а сепак да пренесат салмонела. Салмонелата се лекува со многу течности и електролити.
Лекување
Иако не постои лек за салмонела, а телото мора само да ги исфрли бактериите од телото, постојат работи кои можат да ви помогнат. Прво, осигурајте се да не дехидрирате. До дехидрација може да дојде многу лесно, бидејќи со дијарејата и повраќањето се губи многу вода. Затоа пијте многу течности и внесувајте доволно електролити за да ги олесните симптомите и да го забрзате опоравувањето на телото. Тешките случаи на зараза со салмонела, особено ако се работи за деца или постари лица, бараат хоспитализација каде интравенски се внесува изгубената течност во телото.
