Веројатноста за инфекција со новиот коронавирус значајно е помала по првата доза вакцина на АстраЗенека или Фајзер, покажало британско истражување.Вакцините делувале еднакво и кај оние постари од 75 години и оние кои страдале од други здравствени тегоби, заклучиле научниците.
Истражувањето на Националниот завод за статистика на Велика Британија и Универзитетот Оксфорд утврдило дека и по двете вакцини се развива силен одговор на антитела кај сите возрасни категории.
Кај секое вакцинирано лице, пронајдена е реакција на вакцината, без оглед дали е вакцинирано со АстраЗенека или со Фајзер. Истражувањето, кое е резултат на две студии, се уште не е објавено и не поминало здравствена рецензија.
Темелено е на вирусни тестирања на 370.000 жители во Британија и е едно од досега најголемите истражувања и нуди увид во дополнителни докази од реалниот живот дека вакцините кои ги користи Британија во борба против КОВИД-19 се ефикасни во заштита на луѓето од инфекција со новиот коронавирус.
Во првата студија утврдено е дека лицата кои примиле една доза од вакцината на АстраЗенека или Фајзер имале 65 проценти помала веројатност да се заразат со коронавирус.
Три недели по првата доза, од декември 2020. до почетокот на април 2021., симптоматските инфекции се намалиле за 74 проценти, а асимптоматските за 57 проценти.
Кај лицата кои ја примиле втората доза Фајзер веројатноста за инфекција била 90 проценти помала. Иста пресметка не можело да асе направи за АстраЗенека, бидејќи бил премал бројот на лице кои ја примиле втората доза, поради тоа што вакцинацијата со овој вид вакцина почнало подоцна.
Студијата покажала дека и двете вакцини се ефикасни против новата британска варијанта на коронавирусот В.1.1.7.
Д-р Коен Пауелс, научник од Оксфорд вели дека податоците покажале дека одлуката за зголемување на периодот помеѓу две дози вакцина била правилна.
“Нивото на заштита од нова инфекција што го дало само една доза од вакцината ја поддржува одлуката да се продолжи времето помежу првата и втората доза на 12 недели како би се максимизирала покриеноста на населението со прва доза вакцина и би се намалиле хоспитализациите и смртноста“, вели тој.
Но, предупредува тој, податоците покажуваат дека се уште постои можност за инфекција на вакцинираните лица, како и да ја пренесат заразата на други лица, што значи дека е потребно да се држат до мерки како одржување растојание и носење маски.
Втората студија на 46.000 возрасни лица кои примиле една доза вакцина, покажала дека имале силен одговор на антитела, што е знак дека вакцината стимулира одбрана на организмот на заштита од вирусот – кај сите возрасни групи.
“Тој одговор на антитела се одразува нашироко и до десетта недела“, напишале научниците.
Иако нивоата на антитела се зголемувале побавно и до пониски нивоа по една доза АстраЗенека, нивото на антитела побрзо паѓало по една доза Фајзер, особено кај постарите лица.
По првата доза воочен е подобар одговор на имуниот систем кај млади возрасни лица во однос на постари од 60 години, но по двете дози вакцина, нивото на антитела било високо кај сите возрасни категории, покажала студијата.
Еден податок што ги изненадил научниците бил колку имуниот одговор по втората доза вакцина се зголемил кај лицата постари од 80 години – многу повеќе отколку кај младите лица.
